Հայաստանի ազգային հավաքականը չի վախենում Պորտուգալիայի և Իռլանդիայի հավաքականներից. Էդուարդ Սպերցյան

Հայաստանի ազգային հավաքականի կիսապաշտպան Էդուարդ Սպերցյանը հարցազրույց է տվել "РБ Спорт"-ին՝ նոր մրցաշրջանի մեկնարկի, եվրոպական ակումբների հետաքրքրության և Հայաստանի հավաքականի՝ 2026 թվականի ՖԻՖԱ-ի աշխարհի առաջնության եզրափակիչ փուլ դուրս գալու հնարավորությունների մասին։ 

«Արմենպրես»-ը ներկայացնում է հարցազրույցն ամբողջությամբ։ 

-Դուք գոլ խփեցիք և գոլային փոխանցում կատարեցիք «Կրասնոդար»-ի առաջին խաղում՝ որպես ՌՊԼ-ի գործող չեմպիոն։ Ի՞նչ կարող եք ասել «Պարի ՆՆ»-ի հետ կայացած խաղի մասին։

-Իհարկե, շատ դժվար խաղ էր։ Բայց մրցաշրջանի սկիզբը միշտ դժվար է լինում, այլ կերպ լինել չի կարող։ Այնուամենայնիվ, կարծում եմ, որ «Կրասնոդարը» վստահորեն հաղթեց «Պարի ՆՆ»-ին։ Այո, մեր բախտը բերեց, բայց առանց դրա չես կարող։

-Ի՞նչ սպասելիքներ կան նոր մրցաշրջանից։

-«Կրասնոդար»-ը ցանկանում է ապացուցել իր կարգավիճակը՝ որպես ՌՊԼ-ի չեմպիոն։ Մեր թիմի համար յուրաքանչյուր հաջորդ խաղ եզրափակչի նման է։ Կարծում եմ, որ հիմա մեր մրցակիցները որոշակի վերաբերմունք կունենան մեր նկատմամբ, բոլորը կպայքարեն և կփորձեն խաղալ իրենց լավագույն խաղը։ Բայց մենք նաև ավելի մոտիվացված ենք դառնում, քան նախորդ մրցաշրջանում։ 

-Ինչպե՞ս են նորեկները տեղավորվում թիմում՝ Ժուբալը, Դուգլաս Աուգուստոն, Գուստավո Ֆուրտադոն։ 

-Շատ լավ խաղացողներ են միացել «Կրասնոդար»-ին, և նրանք հեշտությամբ են մերվել թիմին։ Ի վերջո, մեր ակումբում կան շատ լեգեոներներ, որոնք խոսում են անգլերեն։ Այնպես որ, նորեկները խնդիրներ չունեն հարմարվելու հետ կապված։ Մենք ունենք լավ թիմ, որտեղ բոլորը փորձում են օգնել միմյանց։ 

-Ինչպե՞ս են եվրոպական ակումբների կողմից հետաքրքրության մասին լուրերը ազդում Ձեզ վրա։

-Ես արդեն բազմիցս պատասխանել եմ այդ հարցին։ Արդեն երեք տարի է, ինչ տարբեր լուրեր են շրջանառվում։ Բայց երբ կոնկրետ առաջարկներ լինեն, այդ ժամանակ կխոսենք։

-Լրատվամիջոցները գրում են ՊՍԺ-ի և «Ժիրոնա»-ի հետ բանակցությունների մասին։

- Ես անձամբ դեռ որևէ կոնկրետ բան չգիտեմ։

- Բայց եթե ընտրության հնարավորություն ունենայիք, ո՞ր առաջնությունը կընտրեիք՝ Ֆրանսիա՞ն, թե՞ Իսպանիան։ 

- Եկեք հիմա դրա մասին չխոսենք։ Ես չեմ ուզում մեկնաբանություններ անել։

- Եվրոպական ֆուտբոլի մասին խոսելիս՝ չենք կարող չհարցնել ռուսական թիմերին միջազգային մրցաշարերից որակազրկելու մասին: Ե՞րբ կտեսնենք վերադարձը եվրոպական մրցաշարեր: 

- Չգիտեմ, բայց մենք, իհարկե, ուզում ենք խաղալ եվրոպական մրցաշարերում և սպասում ենք, որ ռուսական ակումբները վերադառնան համաշխարհային մրցաշարեր:

- Հայաստանի հավաքականը՝ ի տարբերություն Ռուսաստանի հավաքականի, մասնակցում է պաշտոնական մրցաշարերին և սեպտեմբերին աշխարհի առաջնության ընտրական մրցաշարում կխաղա նախ Պորտուգալիայի, ապա՝ Իռլանդիայի դեմ։ Ի՞նչ տրամադրություն կա այդ խաղերի առթիվ։

- Հայաստանի ազգային ընտրանին չի վախենում Պորտուգալիայի և Իռլանդիայի հավաքականներից։ Հայ ֆուտբոլիստները մինչև վերջ կպայքարեն Երևանում կայանալիք խաղերում։ 

- Ինչպե՞ս եք գնահատում Հայաստանի հավաքականի հնարավորությունները՝ հասնելու Աշխարհի առաջնության եզրափակիչ փուլ։ 

- Բարձր մակարդակի թիմերի դեմ խաղերում միշտ չէ, որ հնարավոր է արդյունքի հասնել, բայց մենք վճռականորեն տրամադրված ենք ֆուտբոլ խաղալ և կփորձենք մեր ուժերը։