Կատարյալ սպորտային եզրափակիչ. հայտնի են ՀՀ վարչապետի հովանու ներքո անցկացվող բասկետբոլի լիգայի բոլոր հաղթողները

Սպորտի կառավարման կենտրոնի ենթակայությամբ գործող «Միկա» մարզահամալիրում ավարտվեցին ՀՀ վարչապետի հովանու ներքո անցկացվող «Դպրոցականների բասկետբոլի լիգա» մարզական  առաջին խաղերը:

«Արմենպրես»-ի հաղորդմամբ` 7 -9-րդ դասարանների եզրափակիչ խաղերին, որտեղ մրցում էին Երևանի N 51 հիմնական դպրոցը ու Երևանի N 2 հիմնական դպրոցը, ներկա էին ՀՀ վարչապետ Նիկոլ Փաշինյանը,  կրթության, գիտության, մշակույթի և սպորտի նախարար Ժաննա Անդրեասյանը, Երևանի քաղաքապետ Տիգրան Ավինյանը:

Իսկական սպորտային դրամայով լեցուն եզրափակիչում հաղթեց Երևանի N 51 հիմնական  դպրոցը` 62:56 հաշվով: Այս տարիքային խմբում երրորդ հորիզոնականը զբաղեցրեց Երևանի N 137 հիմնական դպրոցը:

Իսկ 5-6-րդ դասարանների մրցապայքարում լավագույն եռյակում մրցանակային տեղերը զբաղեցրեցին Երևանի N 174 հիմնական դպրոցը, Եղվարդի N 3 հիմնական դպրոցն ու Արթիկի N 1 հիմնական դպրոցը:

Պարգևատրման պաշտոնական արարողություն կատարեցին ՀՀ վարչապետ Նիկոլ Փաշինյանն ու ԿԳՄՍ նախարար Ժաննա Անդրեասյանը:

«Պիտի խոստովանեմ, որ մեկ տարի առաջ, երբ նախագծում էինք «Դպրոցականների բասկետբոլի լիգա»-ն, հույս ունեինք, բայց պիտի տեսնեինք ու համոզվեինք, որ այն ստացվում է: Սա առաջին մրցաշարն էր, և հույս ունեմ, և դուք էլ կհամաձայնեք, որ այն այսօր արդեն իսկ կայացած է: Առաջիկա տարիներին այն անպայման պետք է շարունակվի: Այս մրցաշարի նպատակն է մեր աշակերտների ինքնադրսևորվելու հնարավորություն տալ, ուժեղացնել թիմային ոգին ու հասկանալ, որ հաղթում են այն թիմերը, որոնք առավել շատ են աշխատում իրենց վրա, ովքեր առավել շատ են հավատում հաղթանակին»,- ասաց վարչապետ Փաշինյանը:

ՀՀ ԿԳՄՍ նախարար Ժաննա Անդրեասյանն իր խոսքում ընդգծեց, որ մրցաշարին մասնակցող թիմերն իսկապես անմնացորդ նվիրվեցին ու ցուցադրեցին հրաշալի խաղ:

«Նմանատիպ մրցաշարերի ամենակարևոր նպատակն այն է, որ երեխաները զբաղվեն սպորտով, ու սա այն դեպքն է, որ սպորտն ավելին է, քան մարզաձև: Սպորտը մարզում է մարմինը, մարզում է միտքը, սպորտը սովորեցնում է միասին, թիմային աշխատանք կատարել»,- ասաց նա:

1-ին տեղ գրաված դպրոցները պարգևատրվեցին 4,000,000 ՀՀ դրամով, 2-րդ տեղը՝ 2,500,000 ՀՀ դրամով, 3-րդ տեղը՝ 1,500,000 ՀՀ դրամով: Պարգևատրվեցին նաև դպրոցի ֆիզկուլտուրայի ուսուցիչները՝ 1-ին տեղ՝ 700,000 ՀՀ դրամ, 2-րդ տեղ՝ 500,000 ՀՀ դրամ, 3-րդ տեղ 300,000 ՀՀ դրամ: Մրցաշարի հաղթող թիմերի աշակերտները պարգևատրվեցին դրամական մրցանակներով՝ 1-ին տեղ (9 աշակերտ)՝ 150,000-ական ՀՀ դրամ, 2-րդ տեղ (9 աշակերտ)՝ 100,000-ական ՀՀ դրամ, 3-րդ տեղ (9 աշակերտ)՝ 75,000-ական դրամ: