Իջևանում կձևավորվեն ինտենսիվ այգեգործական կլաստերներ․ ծրագիրը կառնչվի ավելի քան 300 տնամերձ հողամասի
3 րոպեի ընթերցում
Տավուշի մարզի Իջևան համայնքի չորս բնակավայրերում՝ Բերքաբերում, Խաշթառակում, Կիրանցում և Ծաղկավանում, կմեկնարկի նոր ծրագիր՝ տնամերձ հողամասերում բարձր բերքատվության այգիների հիմնումով։ Այն միտված է հողի արդյունավետ օգտագործմանը, ֆերմերների եկամուտների ավելացմանը և տարածաշրջանում այգեգործական կլաստերների ձևավորմանը։
«Արմենպրես»-ի փոխանցմամբ՝ կառավարության նիստում այս մասին հայտնեց ՀՀ էկոնոմիկայի նախարարի տեղակալ Արման Խոջոյանը։
«Ծրագրից օգտվելու ցանկություն է հայտնել 305 տնտեսվարող՝ ընդհանուր առմամբ շուրջ 18.2 հա տնամերձ հողատարածքներում։ Նմանատիպ նախորդ ծրագիրը Բերքաբերում և Խաշթառակում իրականացվել է 5.84 հեկտար մակերեսով՝ կնքվել է 87 պայմանագիր», – տեղեկացրեց նա։
Համայնքները կազմակերպելու են հողի ագրոքիմիական փորձաքննություն, ծախսերի գնահատում և կապալառուի ընտրության մրցույթ։ Կառավարությունը կապալառուի աշխատանքի համար կապահովի 95 տոկոս համաֆինանսավորում, իսկ մնացած 5 տոկոսը համայնքի ներդրմամբ կիրականացվի։ Շահառուները ծրագրին մասնակցելու համար պետք է դիմեն համայնքի ղեկավարին մինչև 2025թ. հուլիսի 15-ը։ Կապալառու կազմակերպությունը պարտավորվելու է 2 տարի շարունակ շահառուներին տրամադրել անվճար խորհրդատվություն և ուսուցում։ Նախաձեռնությունը նաև ներառվում է ավելի լայն կլաստերային տեսլականի մեջ․
«Աչաջուրում լոգիստիկ կենտրոն է կառուցվում՝ սառնարանային ու վերամշակման ենթակառուցվածքներով, որը շահագործման կհանձնվի այս տարվա սեպտեմբերին։ Կենտրոնը կծառայի որպես հանգույց՝ նորաստեղծ տնամերձ այգիներից և հարակից համայնքներից մթերման և իրացման համար»,-նշեց փոխնախարարը։
Վարչապետ Նիկոլ Փաշինյանն իր ելույթում ծրագիրը հեղափոխական համարեց՝ շեշտելով դրա ռազմավարական ու մշակութային նշանակությունը։
«Այս գաղափարը հիմնված է այն ակնհայտ դիտարկման վրա, որ տնամերձ հողամասերը չեն տալիս այն արդյունքը, որն իրականում կարող են տալ։ Իսկ երբ միևնույն համայնքում ձևավորվում են միատեսակ մշակաբույսերով ինտենսիվ այգիներ, հնարավոր է ձևավորել շուկայում հետաքրքիր ապրանքային խմբաքանակ»,-ասաց Փաշինյանը։