2 րոպեի ընթերցում
Շենգավիթ վարչական շրջանի ղեկավար Ռազմիկ Մկրտչյանը դադարեցնում է իր պաշտոնավարումը: «Արմենպրես»-ի փոխանցմամբ՝ թաղապետը որոշման մասին հայտնել է «Ֆեյսբուք»-ի իր էջում կատարած գրառման միջոցով՝ նշելով, որ հրաժարականի պատճառը զուտ անձնական խնդիրներն են:
«Սիրելի՛ շենգավիթցիներ, 2018 թվականից ստանձնելով Շենգավիթ վարչական շրջանի ղեկավարի բարդ և պատասխանատու պաշտոնը՝ միասին ահռելի նախաձեռնություններ և ծրագրեր ենք կյանքի կոչել, բազմաթիվ առաջարկներից եմ հրաժարվել, որպեսզի շարունակեմ ծառայել վարչական շրջանին՝ նպաստելով համայնքի բարեկեցությանը: Սակայն երկարատև ժամանակ է իմ աշխատանքային ճանապարհը, որպես Շենգավիթ վարչական շրջանի ղեկավար, դադարեցնելու միտք կար, և այսօր եկել է այն պահը, որ տեղեկացնեմ ձեզ իմ աշխատանքային պարտականությունները դադարեցնելու որոշման մասին։
Շտապեմ նշել՝ խուսափելով շահարկումներից, որ պատճառներն անձնական են և անձնական խնդիրներից զատ այլ հանգամանքներով չպայմանավորված։
Շնորհակալ եմ վարչական շրջանի ղեկավարի աշխատակազմին՝ համատեղ թիմային և սրտացավ աշխատանքի համար, համայնքային բոլոր գերատեսչություններին՝ արդյունավետ համագործակցության համար, շենգավիթցիներին՝ անվերապահ վստահության և աջակցության համար։
Շնորհակալություն եմ հայտնում Շենգավիթ վարչական շրջանի ղեկավարի պաշտոնը ինձ վստահելու և թույլ տալու իմ համեստ ներդրումն ունենալ համայնքի զարգացման նվիրական գործում»,- գրել է նա: