1 րոպեի ընթերցում
Թաիլանդում հսկայական վայրի փիղը առավոտյան ժամը 3-ի սահմաններում սնունդ փնտրելու նպատակով մտել է խանութ, որտեղ հյուրասիրվելուց հետո հեռացել է։ «Արմենպրես»-ի փոխանցմամբ՝ այս մասին հաղորդում է New York Post-ը:
Տեղացիների շրջանում Պլայ Բիանգ Լեկ անունով հայտնի փղին ֆիքսել է Բանգկոկից հյուսիս գտնվող Պակ Չոնգ քաղաքի խանութի տեսախցիկը։ Տեսանյութում երևում է հսկայական փիղը՝ կանգնած խանութի փոքրիկ միջանցքներում. նրա գլուխը դիպչում է առաստաղին։
Սնունդը զննելուց հետո և նախքան դանդաղորեն դուրս գալը փիղը կուլ է տվել բրնձի կրեկերներ և ձվեր։
Լրատվամիջոցի փոխանցմամբ՝ տեղացիները սովոր են տեսնել Պլայ Բիանգ Լեկին խանութի կողքով անցնելիս, սակայն նա երբեք չի փորձել մտնել այնտեղ։ Այս անգամ փիղը զարմացրել և անհանգստացրել է բնակիչներին ու խանութի տիրոջը՝ ներս մտնելով։
2023 թվականին փղին նկատել էին ռեստորան ներխուժելիս այն ժամանակ, երբ սեփականատերերը քնած էին։