Գերմանիայի կանցլերը հայտարարել է, որ ԱՄՆ-ին չի հաջողվի առանձին-առանձին առևտրային բանակցություններ վարել ԵՄ երկրների հետ
1 րոպեի ընթերցում
Գերմանիայի կանցլեր Ֆրիդրիխ Մերցը հայտարարել է, որ ԱՄՆ նախագահ Դոնալդ Թրամփի հետ վերջերս կայացած զրույցի ընթացքում նա բացատրել է Վաշինգտոնի համար Եվրամիության առանձին անդամների հետ առևտրային հարցերը քննարկելու հնարավորության բացակայությունը:
Ինչպես հաղորդում է «Արմենպրես»-ը, վկայակոչելով «Ինտերֆաքս»-ը, այս մասին գրում է Bloomberg-ը:
Մերցը հավելել է, որ միևնույն ժամանակ շնորհավորել է Թրամփին ԱՄՆ-ի և Մեծ Բրիտանիայի միջև առևտրային համաձայնագրի կնքման կապակցությամբ:
«Բայց ես նրան բացատրեցի, որ նման բան հնարավոր չի լինի եվրոպական այլ երկրների հետ, որոնք ԵՄ անդամ են, քանի որ մենք կարող ենք և ցանկանում ենք միասնական ճակատով գործել առևտրի հարցերում»,- նշել է կանցլերը: