2 րոպեի ընթերցում
Հայկական լրատվամիջոցների ներկայացուցիչները ապրիլի 5-ին հավաքվել էին Հայաստանի շախմատի ակադեմիայում՝ մասնակցելու լրագրողների շախմատային մրցաշարի հոբելյանական՝ տասներորդ առաջնությանը։ «Արմենպրես»-ի փոխանցմամբ՝ մրցաշարը կազմակերպվել էր Երևանի քաղաքապետարանի հովանավորությամբ։ Աջակիցներն էին «Sil Maaza», «Sweetberg» ընկերությունները և ARARAT Երևանի կոնյակի գործարանը։
Մրցաշարի նպատակը շախմատի նկատմամբ հետաքրքրության խթանումն էր լրագրողական շրջանակներում, ինչպես նաև ոլորտի ներկայացուցիչների միջև ոչ պաշտոնական շփման ձևավորումը։
Մրցաշարի արդյունքներով՝
· Առաջին տեղը զբաղեցրեց «Գոլոս Արմենիի» թղթակից Վադիմ Մկրտչյանը՝ վաստակելով 6 միավոր 7 հնարավորից։ Սա նրա ութերորդ հաղթանակն էր լրագրողական շախմատային մրցաշարերում։
· Երկրորդ տեղում էր անցյալ տարվա մրցաշարի հաղթող «Արմենպրես» պետական լրատվական գործակալության գլխավոր խմբագրի տեղակալ Արարատ Պետրոսյանը՝ 5,5 միավորով։
· Երրորդ տեղը զբաղեցրեց ՀՀ արդարադատության նախարարի խորհրդական Նորայր Շողիկյանը՝ 4,5 միավորով։
Բացի հիմնական մրցանակներից, հանձնվեցին նաև հատուկ մրցանակներ։ Երևանի կենդանաբանական այգու մամուլի և հասարակայնության հետ կապերի պատասխանատու Լուսինե Գրիգորյանը պարգևատրվեց որպես միակ կին մասնակից։ «Ֆուտբոլ պլյուս» շաբաթաթերթի հիմնադիր Սուրեն Բաղդասարյանը ճանաչվեց որպես մրցաշարի ամենատարեց մասնակից։ «Սպուտնիկ Արմենիա»-ի ներկայացուցիչ Արծրուն Կոստանդյանը ստացավ մրցանակ ամենաարագ հաղթանակի համար, որը գրանցվել էր ընդամենը երեք րոպեում։
Մրցանակները՝ գավաթներ, մեդալներ և պատվոգրեր, մրցանակակիրներին հանձնեց Հայաստանի հավաքականի առաջատար, միջազգային գրոսմայստեր Շանթ Սարգսյանը։
Մրցաշարի ավարտին Արտասահմանյան թղթակիցների ասոցիացիայի նախագահ Տիգրան Հովհաննիսյանը նշեց, որ մրցանակակիրները կստանան նաև դրամական պարգևներ։
