ՀՀ ԱԺ փոխնախագահը Վիետնամի գործընկերոջ հետ հանդիպմանն անդրադարձել է ռազմարդյունաբերության ու պաշտպանության բնագավառներում գործակցության հնարավորություններին

Հայաստանի Ազգային ժողովի նախագահի տեղակալ Հակոբ Արշակյանն ապրիլի 4-ին ընդունել է Վիետնամի Սոցիալիստական Հանրապետության Ազգային ժողովի փոխնախագահ Ճան Քուան Ֆընին եւ Վիետնամի խորհրդարանի պատգամավորներին, որոնք Հայաստան են ժամանել Վիետնամի ԱԺ նախագահ Չան Թան Մանի գլխավորած պատվիրակության կազմում;

Ինչպես «Արմենպրես»-ը տեղեկանում է ՀՀ ԱԺ-ի տարածած հաղորդագրությունից, Հակոբ Արշակյանն ընդգծել է Վիետնամ-Հայաստան ջերմ հարաբերությունները, որը շարունակական զարգացման միտում ունի: Նրա գնահատմամբ՝ ՀՀ ԱԺ նախագահ Ալեն Սիմոնյանի` վերջերս կատարած այցը Վիետնամ եւ Վիետնամի ԱԺ նախագահի փոխադարձ այցը Հայաստան նոր հնարավորություններ են ստեղծում երկխոսության զարգացման համար:

Հակոբ Արշակյանը կարեւորել է երկու երկրների միջեւ բազմոլորտ կապերի խթանումը, խոսել ռազմարդյունաբերության ու պաշտպանության բնագավառներում գործակցության հնարավորությունների մասին: Նրա գնահատմամբ՝ Վիետնամում անցկացված Defense Expo 2024 ցուցահանդեսին հայկական մասնակցությունը նույնպես համագործակցության ցուցիչ է: 

ՀՀ ԱԺ փոխնախագահը կարեւոր է համարել նաեւ վիետնամական ընկերությունների ներկայությունը Հայաստանում անցկացվող նմանատիպ միջոցառումներին:

Ըստ Հակոբ Արշակյանի՝ մուտքի վիզաների պահանջի փոխադարձաբար վերացման ու օդային հաղորդակցությունների մասին համաձայնագրերի ստորագրումը եւ երկու պետությունների միջեւ ուղիղ ավիաչվերթների հաստատումն առանցքային նշանակություն կարող են ունենալ: Ֆինանսական ոլորտում փոխգործակցության մասով էլ նա առաջարկել է բանակցություններ սկսել կրկնակի հարկումից խուսափելուն առնչվող համաձայնագրի կնքման շուրջ: ԱԺ փոխխոսնակը կարեւորել է նաեւ կապերի զարգացումը կրթության բնագավառում:

ՀՀ ԱԺ փոխնախագահը հյուրերին ներկայացրել է տարածաշրջանային մարտահրավերները, Հայաստանի եւ Ադրբեջանի միջեւ խաղաղության պայմանագրի շուրջ ընթացող բանակցությունները, փաստել, որ հայկական կողմը պատրաստ է ստորագրել փոխհամաձայնեցված փաստաթուղթը:

Վիետնամի Ազգային ժողովի փոխնախագահն իր հերթին արժեւորել է տարածաշրջանային խաղաղությունն ու կայունությունը, աջակցություն հայտնել Հայաստանի եւ Ադրբեջանի միջեւ հարաբերությունների կարգավորման գործընթացին: Ճան Քուան Ֆընը եւս բարձր է գնահատել Հայաստանի եւ Վիետնամի միջեւ հաստատված բարեկամական հարաբերությունները, կարեւորել բազմաբեւեռ համագործակցության խորացումը: Անդրադարձ է եղել նաեւ միջխորհրդարանական հարթակներում փոխգործակցության օրակարգերին:

Հանդիպմանը մասնակցել են նաեւ ՀՀ ԱԺ Հայաստան-Վիետնամ բարեկամական խմբի անդամ Արուսյակ Մանավազյանն ու ԱԺ պաշտպանության եւ անվտանգության հարցերի մշտական հանձնաժողովի նախագահի տեղակալ Արմեն Խաչատրյանը: