2 րոպեի ընթերցում
ԱՄՆ իշխանություններն արդեն ստացել են Օմանի միջոցով փոխանցված Իրանի պատասխանն ԱՄՆ նախագահ Դոնալդ Թրամփի նամակին ՝ իրանական միջուկային ծրագրի շուրջ բանակցությունների առաջարկով։ «Արմենպրես»-ի փոխանցմամբ՝ այդ մասին հայտարարել է Իրանի արտաքին գործերի նախարար Աբբաս Արաղչին IRIB հեռուստաալիքին տված մեկնաբանությունում։
«Ըստ Օմանից մեր բարեկամների տեղեկատվության՝ նամակն արդեն հասել է հասցեատիրոջը և ուսումնասիրվել է», - նշել է նա:
Ավելի վաղ Արաղչին հայտնել էր, որ նամակում Իրանը հաստատել է իր դիրքորոշումն այն մասին, որ երկիրը չի մասնակցի ուղղակի բանակցությունների, քանի դեռ ենթարկվում է ռազմական սպառնալիքների և ճնշման, սակայն պատրաստ է անուղղակի բանակցությունների։
Մարտի 31-ին Դոնալդ Թրամփն Իրանին սպառնացել է ռմբակոծությամբ և երկրորդային մաքսատուրքերով, եթե Թեհրանը Վաշինգտոնի հետ համաձայնագիր չկնքի իր միջուկային ծրագրի շուրջ։
Իր հերթին Իրանի գերագույն առաջնորդ Այաթոլլա Ալի Խամենեին հայտարարել է, որ չի հավատում, թե ԱՄՆ-ն երկրի վրա կարող է գրոհել դրսից, սակայն եթե Վաշինգտոնը փորձի ապստամբություն հրահրել Իրանի Իսլամական Հանրապետության ներսում, ապա կոշտ պատասխան կստանա:
