Ֆոն Մեկ և Չայկովսկի ընտանիքների ժառանգը Երևանում կներկայացնի «Չայկովսկի. երաժշտություն առանց վիզաների» նախագիծը

Երևանում մարտի 26-ից 28-ը կկայանա «Չայկովսկի. երաժշտություն առանց վիզաների» միջազգային մշակութային և կրթական եզակի նախագիծը, որն իրականացվում է «Նադեժդա Ֆիլարետովնա ֆոն Մեկ» միջազգային բարեգործական հիմնադրամի կողմից՝ Նախագահի մշակութային նախաձեռնությունների հիմնադրամի աջակցությամբ։ 

«Արմենպրես»-ի հաղորդմամբ՝ ծրագրի նպատակներից է երկրների, քաղաքների և մշակութային, գեղարվեստական և կրթական հաստատությունների միջև բարեկամական հարաբերություններ հաստատելը՝ Պ. Ի. Չայկովսկու երաժշտական ժառանգությունը հանրահռչակելու համար և տաղանդավոր երիտասարդներին աջակցելու նպատակով: 

Պյոտր Իլյիչ Չայկովսկու 2025 թվականի մայիսի 7-ին լրացող ծննդյան 185-ամյակը նշանավորող նախագիծը միավորում է 9 երկիր, այդ թվում՝ Հայաստանը, Բելառուսը, Ղազախստանը, Տաջիկստանը, Չինաստանը, Թաիլանդը, Արգենտինան և Մեքսիկան։ Հայաստանը կդառնա առաջին երկիրը, որը կհյուրընկալի միջազգային մշակութային և կրթական նախագիծը։ 

«Չայկովսկի. երաժշտություն առանց վիզաների»-ն առանց վիզայի երաժշտական տարածք է, որտեղ մշակույթները միավորվում են Չայկովսկու հավերժական մեղեդու հնչյունների ներքո՝ անցնելով ժամանակի սահմանները։ Ինչպես նշել է Հիմնադրամի նախագահ, հայտնի ֆոն Մեկ և Չայկովսկի ընտանիքների ժառանգներից մեկը՝ Դենիս ֆոն Մեկը, «այս հոբելյանական տարում մեր նախագիծը նպատակ ունի վերակենդանացնել և հանրահռչակել Պյոտր Իլյիչ Չայկովսկու կյանքի և ստեղծագործության քիչ հայտնի ասպեկտները: Մեր ժամանակներում, երբ ժողովրդական մշակույթն ավելի ու ավելի է հնչում որպես միապաղաղ նվագակցություն, դասական երաժշտությունը վտանգված է և հազիվ լսելի ընդհանուր երաժշտական ֆոնին: Երիտասարդ սերունդը գնալով ավելի է դիմում ներդաշնակության աղբյուրներին, որոնք դարեր շարունակ սնուցել են հոգին: Արդիականության այս կակոֆոնիայում Չայկովսկու եզակի ժառանգությունը կարող է մնալ կիսաձայն: Նախագիծը նպատակ ունի երիտասարդ սերնդին ծանոթացնել Չայկովսկու ժառանգությանը և մշակույթին»։ 

«Ֆոն Մեկ» հիմնադրամը, որը հիմնադրվել է Չայկովսկու ընտանիքի ժառանգ Դենիս ֆոն Մեկի կողմից, նպատակ ունի մարդկանց դարձնել ավելի մաքուր և երջանիկ, իսկ ազգերին՝ ավելի բարեկամական: Մենք հպարտ ենք, որ Չայկովսկու երաժշտությունը միավորում է ժողովուրդներին՝ հաղթահարելով վիզային, լեզվական և մշակութային խոչընդոտները։ Նրա աշխատանքը հիմք դարձավ առանց վիզայի երաժշտական տարածքի ստեղծման, որտեղ մշակույթները հանդիպում և հարստացնում են միմյանց: 

Երևանում նախատեսված են մի քանի դասախոսություններ Չայկովսկու աշխատանքի վերաբերյալ, ստեղծագործական լաբորատորիայում ուսուցիչների և դպրոցի լավագույն աշակերտների համատեղ համերգ, մասնավոր հավաքածուից երկու շրջիկ ցուցադրություն, որտեղ կներկայացվեն «Չայկովսկի» ֆիլմի պաստառները աշխարհի շատ լեզուներով, ինչպես նաև հանճարի դիմանկարով մետաղադրամներ ու մեդալներ՝ աշխարհի 20 երկրներից։