3 րոպեի ընթերցում
Թբիլիսիի քաղաքային դատարանը Վրաստանի երրորդ նախագահ Միխեիլ Սաակաշվիլիին մեղավոր է ճանաչել ավելի քան 3,2 միլիոն դոլար պետական միջոցների յուրացման մեջ և դատապարտել 9 տարվա ազատազրկման։ «Արմենպրես»-ի փոխանցմամբ՝ այս մասին հայտնում է վրացական Mtavari հեռուստաալիքը։
Նա նաև 3 տարի ժամկետով զրկվել է պետական ծառայության պաշտոն զբաղեցնելու իրավունքից։
Սաակաշվիլիի ազատազրկման ժամկետը՝ 2021 թվականի հոկտեմբերի 1-ից մինչև 2025 թվականի մարտի 12-ը, կհամարվի պատժի ժամկետի մաս։
Նույն գործի շրջանակներում դատարանը մեղավոր է ճանաչել նաև Սաակաշվիլիի անվտանգության նախկին ղեկավար Թեյմուրազ Ջանաշիային՝ պարտավորեցնելով նրան վճարել 3000 լարի (ավելի քան 1000 դոլար) տուգանք։
Սաակաշվիլին ներկա չի եղել դատավճռի հրապարակմանը և չի միացել տեսակոնֆերանսի միջոցով։ Դատավոր Բադրի Կոչլամազաշվիլիի խոսքով՝ նախկին նախագահը առողջական խնդիրների պատճառներով չի ցանկացել մասնակցել նիստին։ Դատավճիռը դատարանի դահլիճում դժգոհություն է առաջացրել Սաակաշվիլիի կողմնակիցների շրջանում, և նրանց հեռացրել են։
Սաակաշվիլիին մեղադրանք է առաջադրվել 2014 թվականին պետական միջոցները յուրացնելու համար։ Գլխավոր դատախազության տվյալներով՝ այդ գումարի զգալի մասը 2009-2012 թվականներին ծախսվել է քաղաքական գործչի անձնական կարիքների համար, մասնավորապես՝ «օտարերկրյա խոհարարների, մերսողների, կոսմետոլոգների և դիզայների ծառայությունների համար», ինչպես նաև շքեղ իրեր ձեռք բերելու, զբոսանավերի և ինքնաթիռների վարձակալության, օտարերկրյա ուղևորությունների ժամանակ ինքնաթիռների վարձակալության, ինչպես նաև ուղեկցող անձանց ծախսերի վճարման համար։
Սաակաշվիլին, որն այժմ Ուկրաինայի քաղաքացի է, Վրաստանից հեռացել է 2013 թվականին, ինչից հետո նրա դեմ երկրում հարուցվել է չորս քրեական գործ, որոնցից երկուսով քաղաքական գործչին հեռակա դատապարտել են երեք և վեց տարվա ազատազրկման։ 2007 թ. նոյեմբերի 7-ին ընդդիմության հանրահավաքի ցրման, վրացական «Իմեդի» հեռուստաընկերության գրասենյակի ավերման և մոտ 9 միլիոն լարիի (ավելի քան 3,2 միլիոն դոլար) պետական միջոցների յուրացման գործերը գտնվում էին քննարկման փուլում։
2021 թ. հոկտեմբերին Սաակաշվիլին գաղտնի ժամանել է Վրաստան, բայց ձերբակալվել է, ինչից հետո նրան առաջադրվել է նոր մեղադրանք՝ սահմանի ապօրինի հատում։ 2022 թ. մայիսին առողջական վիճակի վատթարացման պատճառով նրան տեղափոխել են Թբիլիսիի «Վիվամեդ» մասնավոր կլինիկա, որտեղ նա այժմ գտնվում է: