2 րոպեի ընթերցում
Հայաստանի Հանրապետության հակակոռուպցիոն կոմիտեից հաստատեցին, որ ևս մեկ պաշտոնատար անձ է ձերբակալվել Երևանի քաղաքապետարանից։
«Արմենպրես»-ի թղթակցի հետ զրույցում ՀՀ հակակոռուպցիոն կոմիտեի մամուլի քարտուղար Մարինա Օհանջանյանը մանրամասնեց, որ քաղաքապետարանի պաշտոնատար անձը ձերբակալվել է նույն քրեական վարույթի շրջանակներում, ինչ նախորդները։
«Նշված քրեական վարույթով ներկա պահին շուրջ մեկ տասնյակ մեղադրյալ կա։ Նախապես հայտնել էինք, որ գործը վերաբերում է կաշառք տալուն-ստանալուն»,-մանրամասնեց Օհանջանյանը։
Ավելի վաղ՝ Երևանի քաղաքապետի խոսնակ Հայկ Կոստանյանը տեղեկացրել է, որ դեռևս նախորդ ամիս Երևանի քաղաքապետարանի պաշտոնյանների ձերբակալությունից հետո, նշված գործի շրջանակում այսօր ձերբակալվել է Երևանի քաղաքապետարանի ևս մեկ պաշտոնյա։
Փետրվարի 5-ին Հակակոռուպցիոն կոմիտեից հայտնել են, որ Երևանի քաղաքապետարանի պաշտոնատար անձինք ձերբակալվել են Հակակոռուպցիոն կոմիտեի վարույթի շրջանակում։ «Քննչական գործողություններն իրականացվում են Հակակոռուպցիոն կոմիտեի վարույթի շրջանակում, կան ձերբակալված պաշտոնատար անձինք Երևանի քաղաքապետարանից»,- նշել են Հակակոռուպցիոն կոմիտեից՝ նախաքննության շահերով պայմանավորված՝ այլ մանրամասներ չհաղորդելով։