2 րոպեի ընթերցում
Մարկ Ցուկերբերգին պատկանող Meta ընկերությունը 25 միլիոն դոլար կվճարի ԱՄՆ նախագահ Դոնալդ Թրամփին՝ կապված հայցի հետ, որը Թրամփը դատարան էր ներկայացրել ընկերության դեմ՝ 2021 թվականին իր օգտահաշիվներն արգելափակելու համար։ «Արմենպրես»-ի փոխանցմամբ՝ այս մասին հաղորդում է NBC News-ը։
Facebook-ի և Instagram-ի մայր ընկերություն հանդիսացող Meta-ի խոսնակ Էնդի Սթոունը հայտնել է, որ ընկերությունը կվճարի 25 միլիոն դոլար, որից 22 միլիոնը կհատկացվի Թրամփի նախագահական գրադարանի հիմնադրամին, իսկ մնացածը կհատկացվի դատական ծախսերին և այս գործով մյուս հայցվորներին:
Կողմերի միջև համաձայնությունը չի պահանջում, որ Meta-ն ընդունի, որ սխալ է վարվել, նշել է Սթոունը։ Սպիտակ տունը հրաժարվել է մեկնաբանել այս տեղեկությունները։
Թրամփի օգտահաշիվներն արգելափակվել էին Meta-ի կողմից, քանի որ ընկերությունը վտանգավոր էր համարել 2021 թվականի հունվարի 6-ին Կապիտոլիումում տեղի ունեցած անկարգությունների վերաբերյալ նրա հայտարարությունները։
NBC News-ի տվյալներով՝ Meta-ն երկրորդ խոշոր ընկերությունն է, որը կվճարի Թրամփի հայցի համար նախագահական ընտրություններում նրա հաղթանակից հետո։ 2024 թ. դեկտեմբերին ABC հեռուստաընկերությունը հայտարարել էր, որ կվճարի 15 միլիոն դոլար՝ լուծելու այն վեճը, որում Թրամփը պնդում էր, որ հաղորդավար Ջորջ Ստեֆանոպուլոսը զրպարտել է իրեն:
Մարկ Ցուկերբերգը 2024 թվականի ընտրություններում Թրամփի հաղթանակից ի վեր փորձում է լավ հարաբերություններ պահպանել նրա հետ։ Նա 1 միլիոն դոլար է նվիրաբերել Թրամփի երդմնակալության արարողության համար, որին ներկա է գտնվել՝ նստելով կաբինետի անդամների կողքին: CNN-ը նշում է, որ Ցուկերբերգը նաև մեղմացրել է բովանդակության մոդերացիայի նոր կանոնները Facebook-ում, Instagram-ում և Threads-ում՝ չեղարկելով գործընկերությունը փաստերի ստուգման դիտորդական խմբերի հետ: