1 րոպեի ընթերցում
ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ։ Լոս Անջելեսում արդեն մեկ շաբաթ մոլեգնող երկու անտառային հրդեհներն առնվազն 24 մարդու կյանք են խլել։ Հրշեջները շարունակում են հրդեհաշիջման աշխատանքները, սակայն ըստ կանխատեսումների՝ ուժգին քամիներն ավելի կտարածեն կրակը։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Հրդեհների պատճառով նաև 100 000 մարդ է տարհանվել։ Ամբողջական թաղամասեր վերածվել են ավերակների, տները գետնին են հավասարվել։ Ըստ Կալիֆոռնիայի իշխանությունների՝ շուրջ 12 300 կառույց է վնասվել կամ ոչնչացել։
Ըստ օդերևութաբանների կանխատեսումների՝ մինչև հունվարի 15-ը սպասվում են ուժգին քամիներ՝ 80-120 կմ/ժամ արագությամբ։ Իշխանությունները Լոս Անջելեսի շրջանի գրեթե 10 միլիոն բնակչությանը նախազգուշացրել են, որ նրանց կարող են տարհանման հրահանգներ տրվել բոցերի և թունավոր ծխի պատճառով։