Դիտարկվում է ծանրաքաշ մեքենաների կշռման կայաններն ավելացնելու հարցը

ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ։ ՀՀ քաղաքաշինության, տեխնիկական և հրդեհային անվտանգության տեսչական մարմնի կողմից տրանսպորտի անվտանգության բնագավառում 2024 թվականի ընթացքում իրականացվել է շուրջ 50 000 վերահսկողական գործառույթ։ Ամփոփելով նախորդ տարվա աշխատանքները՝ «Արմենպրես»-ի մամուլի սրահում հրավիրված ասուլիսում ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավար Գարեգին Խաչատրյանը նշեց, որ ուշադրության կենտրոնում են եղել կանոնավոր, ոչ կանոնավոր, տաքսամատոռային փոխադրումները։ 

«Այս ուղղությամբ իրականացրել ենք 2400 դիտարկում, ունեցել ենք 500-ից ավելի վարչական պատասխանատվության մասին արձանագրություն։ Խնդիրն այն է, որ տրանսպորտային միջոցները խախտում են չվացուցակներով նախատեսված մեկնման ժամերը, ինքնակամ շեղվում են երթուղուց, չունեն ճանապարհային թերթիկ, կամ եթե այն առկա է, ապա դրանում բացակայում են համապատասխան նշումները։ Տաքսամատոռային փոխադրումների դեպքում ստուգվում է, թե արդյոք առկա է լիցենզիա։ Բացակայության դեպքում կազմվում է արձանագրություն»,-ասաց Գարեգին Խաչատրյանը։ 

Տարվա ընթացքում ուշադրության կենտրոնում է եղել ծանրաքաշ և մեծ եզրաչափերով տրանսպորտային միջոցների կշռման գործընթացը։ Այս ուղղությամբ նախորդ տարի 45 հազարից ավելի դիտարկում է կատարվել, որից շուրջ 4 հազարի դեպքում գերազանցվել է թույլատրելի բեռնվածությունը։ Խախտման դեպքում յուրաքանչյուր ավելորդ տոննայի համար նախատեսված է տուգանք նվազագույն աշխատավարձի 200-ապատիկի չափով։

«Այս ուղղությամբ տեսչական մարմինն ունի խնդիր։ Վարորդները շրջանցող ճանապարհներով, այսպես ասած, սարերով, ձորերով փորձում են շրջանցել կայանը։ Ասեմ, որ արդեն նախատեսել ենք կշեռքի տեղադիրքի փոփոխություն, որի դեպքում վարորդները հնարավորություն չեն ունենալու շրջանցել կշռման հենակետը»,-ասաց Գարեգին Խաչատրյանը։ 

Քննարկվում է նաև կշռման կայաններն ավելացնելու հարց։ Գարեգին Խաչատրյանը տեղեկացրեց, որ տեսչական մարմինն ունի շարժական կշեռքներ, որոնցով ևս իրականացվում է վերահսկողություն։