Ձմեռային տուրիզմը Հայաստանում կարող է պահանջված դառնալ. կոմիտեի նախագահ

ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ: Ձմեռային տուրիզմի զարգացման համար Հայաստանում մեծ ներուժ կա, և որոշակի ներդրումների արդյունքում այն կարող է դառնալ զբոսաշրջության համար շատ պահանջված:

«Արմենպրես»-ի հետ զրույցում այս մասին նշեց  Զբոսաշրջության կոմիտեի նախագահ Լուսինե Գևորգյանը՝ շեշտելով, որ ձմեռային տուրիզմն ու սպորտաձևերը կարող են շատ հետաքրքրել արաբական աշխարհից՝ ԱՄԷ-ից, Կատարից, Օմանից  և այլ երկրներից եկող զբոսաշրջիկներին:

Լուսինե Գևորգյանի խոսքով՝ ձմեռային զբոսաշրջությունը գեղեցիկ փաթեթավորելու դեպքում կարող է շատ լավ պրոդուկտ դառնալ հենց արևելյան երկրների զբոսաշրջիկների համար: 

«Էկոնոմիկայի նախարարությունը մեծ աջակցություն է ցուցաբերել Ապարանի ձմեռային հանգստյան գոտուն և շարունակում է մշտապես աջակցել: Առհասարակ  խոշոր ներդրողները գտնվում են պետության ուշադրության կենտրոնում: Ամեն ինչ արվում է, որպեսզի ներդրումները կայանան և ծառայեն իրենց նպատակներին:

Նշեմ նաև, որ ՀՀ էկոնոմիկայի նախարարությունը  իրականացնում է «Ենթակառուցվածքներ ներդրումների դիմաց»  ծրագիրը, այսինքն՝ էլեկտրական հոսանքի, ջրի, գազի, ճանապարհների կառուցման մասով պետությունն աջակցություն է ցույց տալիս ներդրողներին»,-ասաց Գևորգյանը:

Նա նշեց, որ ձմեռային տուրիզմի տեսակետից մեծ ներուժ ունի Ծաղկաձորը, որտեղ անհրաժեշտ է պետական ներդրումներ իրականացնել: Ըստ նրա՝ առաջիկայում Զբոսաշրջության կոմիտեն ինչ-որ ծրագրերի շրջանակներում ճանապարհների և հյուրանոցների կողմից մարտուցվող ծառայությունների լավարկում կիրականացնի:

«Շիրակի մարզը նույնպես մեծ պոտենցիալ ունի, այն մեր ամենացուրտ և հյուսիսային մարզն է և այնտեղ համապատասխան ներդրումներ իրականացնելուց հետո մենք կարող ենք ունենալ ամենաերկար ձմեռը Հայաստանում, որը կարող ենք շատ լավ վաճառել ձմեռային սպորտաձևերը սիրող մեր զբոսաշրջիկներին:

Կարծում եմ Հայաստանում ձմեռային զբոսաշրջության  մեծ ներուժ կա, պարզապես զբոսաշրջության այս ճյուղը մի փոքր ավելի ներդրում պահանջող տեսակ է»,-նշեց նա:

Գևորգյանն ընդգծեց՝ ամռան օրերին բացօթյա փառատոնները շատ են և եղանակով պայամանավորված՝ հնարավորությունները շատ ավելի մեծ են, իսկ ձմռան ամիսներին, երբ բացօթյա միջոցառումների  հնարավորություն չկա, պետք է իրականացնել իրադարձային տուրիզմ՝ օրինակ՝ մեծ համերգներ, որոնց գովազդը կիրականացվի նաև հարևան երկրներում, Ռուսաստանում, Վրաստանում, Իրանում:

«Այսինքն, մենք պետք է իրադարձություններ ստեղծենք, որոնց մասնակցելու նպատակով զբոսաշրջիկները գան մեր երկիր: 2018-2019 թվականի Նոր տարվա գիշերը Հանրապետության հրապարակում սերբ երգիչ Գորան Բռեգովիչը ելույթ ունեցավ, հենց այդ երգչի համերգին մասնակցելու համար մեր հարևան երկրներից շատ զբոսաշրջիկներ էին եկել Հայաստան»,-ասաց Գևորգյանը:

Նա ընդգծեց՝ ձմեռային ամիսները լրացնելու և զբոսաշրջիկների լրացուցիչ ներհոսք ապահովելու  համար  պետք է հետաքրքիր նախագծեր իրականացնել. «Օրինակ՝ սեպտեմբերին անցկացված  WCIT-ն և նմանատիպ այլ միջոցառումները, որոնք հնարավոր է բերել Հայաստան, պետք է անցկացնել ոչ թե զբոսաշրջային պիկ ամիսներին՝ այլ ձմռանը»: