397.92
ՀԱՊԿ գլխավոր քարտուղարը հայտարարել է, որ 2024 թվականին կազմակերպությունն ակտիվորեն համալրվել է արդի զենքերով
2 րոպեի ընթերցում
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Հավաքական անվտանգության պայմանագրի կազմակերպության (ՀԱՊԿ) ուժերը 2024 թվականի ընթացքում ակտիվորեն հանդերձվել են արդի զենքերով։ «Արմենպրես»-ի փոխանցմամբ՝ այս մասին ասված է ՀԱՊԿ գլխավոր քարտուղար Իմանղալի Թասմաղամբետովի հոդվածում, որը հրապարակվել է «Ազգային պաշտպանություն» հանդեսում։
«ՀԱՊԿ-ը հետևողականորեն վարում է կազմակերպության ռազմական ներուժի ամրապնդման աշխատանք.... Անցնող տարում տարվել է ՀԱՊԿ Օպերատիվ հակազդման հավաքական ուժերն արդի սպառազինությամբ, ռազմական և հատուկ տեխնիկայով հանդերձման պլանի միջոցառումների իրականացման ակտիվ աշխատանք», - նշել է գլխավոր քարտուղարը։
Մարտական ներուժի մեծացման մյուս քայլերի շրջանակներում կարևոր տեղ են զբաղեցնում ՀԱՊԿ Հավաքական ուժերի բաղադրիչների համատեղ օպերատիվ և մարտական պատրաստության միջոցառումները։ Թասմաղամբետովը հիշեցրել է, որ 2024 թվականին ՀԱՊԿ ճգնաժամային արձագանքման կենտրոնի և ազգային մարմինների կառավարման կետերի բազայում անցկացվել է ՀԱՊԿ Միացյալ շտաբի, Քարտուղարության և անդամ պետությունների շահագրգիռ նախարարությունների և գերատեսչությունների ռազմավարական հրամանատարաշտաբային վարժանք:
Հոդվածում Իմանղալի Թասմաղամբետովը նաև նշել է, որ ՀԱՊԿ-ը Եվրասիայում կայունության պահպանման կարևոր գործոն է և լավ է հաղթահարում հրատապ մարտահրավերները բարդ աշխարհաքաղաքական պայմաններում:
«Ստեղծված պայմաններում ՀԱՊԿ-ը, ցուցադրելով հարմարվողականության մեծ ներուժ, մնում է Եվրասիայում կայունության պահպանման և անվտանգության տարածության ստեղծման կարևոր գործոն», - նշել է նա:
Բաժանորդագրվեք մեր ալիքին Telegram-ում