1 րոպեի ընթերցում
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Կ. Ստանիսլավսկու անվան ռուսական դրամատիկական թատրոնի փոքր բեմում այսուհետ հնարավոր կլինի դիտել «Հարաբերություններ» դրաման, որի հեղինակն ու բեմադրիչն Էլմիրա Սոլոյանն է։
«Արմենպրես»-ի հաղորդմամբ՝ ներկայացման մեջ խաղում են թատրոնի դերասաններ Մանվել Խաչատրյանը, Արմեն Մարգարյանը, Աննա Մանուչարյանը, Ելենա Կասիմյանը։ Բեմադրության մեջ ընդգրկված են նաև Երևանի թատրոնի և կինոյի պետական ինստիտուտի ուսանողները՝ Սուրեն Շահվերդյանի արվեստանոցից։
Պիեսում սիրո պատմություններ են՝ ոգեշնչված ոչ թե դասական գրականությունից, այլ իրական կյանքից։ Հանդիսատեսն իրեն կզգա բեմում կատարվողի մի մասնիկը։ Բոլոր կերպարները վերապրում են սիրո, վախի և հիասթափության զգացողություններ, որոնք ծանոթ են բոլորին, և հենց դա է նրանց խելագարության եզրին հասցնում։
Ներկայացումն առանց խոսքերի է, խոսում են մարդու մարմինը, ժեստերը։
Բեմանկարիչն Արեգ Միրիջանյանն է, ժեստերի թարգմանիչը՝ Ժաննա Ցականյանը: