396.71
ՀԱՊԿ-ում թարմացրել են զորակազմերի տարանցման և ռազմական օդուժի թռիչքների նկատմամբ մոտեցումները
2 րոպեի ընթերցում
ԵՐԵՎԱՆ, 28 ՆՈՅԵՄԲԵՐԻ, ԱՐՄԵՆՊՐԵՍ: Հավաքական անվտանգության պայմանագրի կազմակերպության (ՀԱՊԿ) ղեկավար մարմինները թարմացրել են մոտեցումները զորակազմերի անարգել տարանցման և ռազմական օդուժի թռիչքների ապահովման հարցերին։ «Արմենպրես»-ի փոխանցմամբ՝ այդ մասին ՏԱՍՍ-ին հայտնել է ՀԱՊԿ Միացյալ շտաբի մամուլի քարտուղար Վլադիսլավ Շչեգրիկովիչը։
Նա հիշեցրել է, որ Աստանայում ղազախական կողմի նախագահությամբ տեղի է ունեցել ՀԱՊԿ Արտաքին գործերի նախարարների խորհրդի, Պաշտպանության նախարարների խորհրդի և Անվտանգության խորհուրդների քարտուղարների հանձնաժողովի համատեղ նիստը։
«Ղազախստանի Հանրապետության առաջնահերթություններին համապատասխան՝ թարմացվել են զորակազմերի տարանցման և ռազմական օդուժի թռիչքների անարգել (անվայրէջք) ապահովման մոտեցումները: Փոփոխություններ են կատարվում ՀԱՊԿ հավաքական անվտանգության համակարգի ուժերի և միջոցների կազմավորման կարգավիճակի մասին համաձայնագրում և ՀԱՊԿ անդամ պետությունների համագործակցության համաձայնագրում զինվորական և այլ կազմավորումների, դրանց շարժական գույքի, ինչպես նաև ռազմական նշանակության արտադրանքի փոխադրումների բնագավառում»,- նշել է Շչեգրիկովիչը։
Միացյալ շտաբի մամուլի քարտուղարը նաև նշել է, որ կողմերն առանձնահատուկ ուշադրություն են նվիրել հավաքական անվտանգության համակարգի ուժերի և միջոցների հետագա զարգացմանը։
«Հաստատվել են ՀԱՊԿ օպերատիվ հակազդման հավաքական ուժերի պատրաստման և կիրառման հիմունքները: Համատեղ հանդիպման արդյունքներով ձեռք են բերվել մի շարք այլ համաձայնություններ՝ ուղղված ՀԱՊԿ անդամ պետությունների հավաքական անվտանգության ամրապնդմանը», - ընդգծել է Շչեգրիկովիչը:
Բաժանորդագրվեք մեր ալիքին Telegram-ում