Ռուսաստանում հայտարարել են, որ ՀԱՊԿ-ում Հայաստանի համար դռները բաց են

ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ։ Ռուսաստանը հարգում է Հայաստանի ինքնուրույն կուրսը, որով նա դադարեցրել է իր ակտիվ մասնակցությունը Հավաքական անվտանգության պայմանագրի կազմակերպությունում (ՀԱՊԿ)։

«Արմենպրես»-ի փոխանցմամբ՝ այս մասին հայտնում է ՏԱՍՍ-ը՝ վկայակոչելով Ռուսաստանի Դաշնության նախագահի օգնական Յուրի Ուշակովի խոսքերը։

«Մենք կասկածի տակ չենք դնում մեր հայ գործընկերների՝ իրենց ուղին ինքնուրույն որոշելու իրավունքը»,- ասել է նա՝ միաժամանակ հավելելով, որ դե յուրե Երևանը մնում է ՀԱՊԿ-ի լիիրավ անդամ և այդպիսով պահպանում է բոլոր համապատասխան իրավունքներն ու պարտականությունները։ 

ՌԴ նախագահի օգնականը նաև հավելել է, որ ՀԱՊԿ-ի դռները Հայաստանի համար միշտ բաց են։ 

 «Մենք հույս ունենք, որ վաղ թե ուշ Հայաստանի ներկայացուցիչները կվերսկսեն համագործակցությունն այս կազմակերպության շրջանակներում»,- եզրափակել է Ուշակովը։

Հայաստանի վարչապետ Նիկոլ Փաշինյանը 2024 թվականի փետրվարին հայտարարել էր, որ Հայաստանը գործնականում սառեցրել է մասնակցությունը ՀԱՊԿ-ին։ Նա նշել էր, որ ՀԱՊԿ-ն չի կատարել Հայաստանի նկատմամբ պարտավորությունները, ինչն առանց հետևանքների չէր կարող մնալ։  

Նոյեմբերի 28-ին Աստանայում նախատեսված են միջոցառումներ և հանդիպումներ ՀԱՊԿ-ի շրջանակներում, որոնց Հայաստանը չի մասնակցելու։