2 րոպեի ընթերցում
ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ։ Եգիպտոսում՝ Կարմիր ծովի ափերի մոտ խորտակված նավից փրկվել է 28 մարդ, որոնք թեթև վնասվածքներ են ունեցել։ 16 մարդ, այդ թվում՝ 12 օտարերկրացի, անհետ կորած է։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Sea Story նավը, որում եղել է 44 մարդ, այդ թվում՝ 31 զբոսաշրջիկ և անձնակազմի 13 անդամ, 5-օրյա ջրասուզման ուղևորության էր մեկնել նոյեմբերի 24-ին։ Նավը, սակայն, նոյեմբերի 25-ին խորտակվել է Մարսա Ալամ քաղաքի մոտ։ Ավելի վաղ հաղորդվում էր, որ նավում եղել է անձնակազմի 14 անդամ։
Տեղի իշխանությունները հայտնել են, որ ըստ նախնական տվյալների՝ նավին հարվածել է խոշոր ալիք, և այն 5-7 րոպեի ընթացքում կողաշրջվել է։
«Որոշ ուղևորներ իրենց խցիկներում էին, այդ պատճառով չեն կարողացել փախչել», - հայտնել է նահանգապետ Ամր Հանաֆին։
Նավից ահազանգ է գրանցվել նոյեմբերի 25-ի առավոտյան ժամը 5։30-ին։ Այն պետք է Հուրգադա վերադառնար նոյեմբերի 29-ին։
Նոյեմբերի 25-ի երեկոյան անհետ կորածների որոնողական աշխատանքները դադարեցվել են մինչև առավոտ։
Նավում եղել են ամերիկացի, բելգիացի, բրիտանացի, չինացի, ֆինն, գերմանացի, լեհ, սլովակ, իսպանացի և շվեյցարացի զբոսաշրջիկներ։
Հանաֆին հայտնել է, որ Եգիպտոսի իշխանություններն աշխատում են դեսպանատների, հյուպատոսարանների և համապատասխան իշխանությունների հետ՝ փրկված ուղևորներին աջակցելու համար։ Պաշտոնյան հավելել է, որ նավի մանրակրկիտ տեխնիկական ստուգումը հաստատել է, որ դրա հետ որևէ խնդիր չի եղել։