3 րոպեի ընթերցում
ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ։ Կառավարության նոյեմբերի 21-ի նիստում ընդունեց նախագիծ, որը նպատակ ունի կանոնակարգել գյուղատնտեսական կենդանիների շուկաների գործունեությունը։ «Արմենպրես»-ի հաղորդմամբ՝ այս նախաձեռնությունը նպատակ ունի ապահովել շուկաներում պատշաճ անասնաբուժական վերահսկողություն և կանխել վարակիչ հիվանդությունների տարածումը։
Նշվում է, որ այսօր գյուղատնտեսական կենդանիների շուկաներում վաճառքը տեղի է ունենում առանց պատշաճ վերահսկողության։ Վաճառողներն ու գնորդները պայմանավորվում են առանց կենդանիների առողջության փաստաթղթերի ստուգման։ Սա առաջացնում է մի շարք վտանգներ․ վաճառվող կենդանին կարող է լինել հիվանդ՝ առանց արտահայտված կլինիկական նշանների, վարակիչ հիվանդությունների տարածման վտանգը բարձր է, քանի որ կենդանիները տեղաշարժվում են առանց հսկողության, ֆիզիոլոգիական անհամապատասխանությունները հաճախ հանգեցնում են գնային անհամաձայնությունների, անասնաբուժական փաստաթղթերի ստուգման գործընթացը հիմնականում բացակայում է։
Այս խնդիրները ոչ միայն խաթարում են շուկայի կազմակերպվածությունը, այլև վտանգում են կենդանիների և մարդկանց առողջությունը։
Կառավարությունը նախաձեռնում է իրավական ակտ, որը կսահմանի գյուղատնտեսական կենդանիների շուկաներին ներկայացվող պահանջները։ Նախագծի ընդունումը կերաշխավորի՝ կենդանիների վաճառքի գործընթացի կանոնակարգվածություն, պատշաճ անասնաբուժական վերահսկողություն, վարակիչ հիվանդությունների տարածման ռիսկի նվազեցում, կենդանական ծագման մթերքների բարձրորակ արտադրության բարելավում։
Նախագծով առաջարկվում է՝ վաճառքի ենթակա կենդանիների համար պարտադիր դարձնել առողջության հավաստող փաստաթղթերի առկայությունը, նոր կանոնակարգված շուկաներում ապահովել անասնաբուժական վերահսկողություն, ստեղծել կենդանիների տեղաշարժի հսկման համակարգ՝ «դաշտից պատառաքաղ» սկզբունքով։
Նախագծի ընդունմամբ կստեղծվեն կանոնակարգված շուկաներ, որտեղ կենդանիների վաճառքը կիրականացվի անվտանգության և առողջության բարձր չափանիշներին համապատասխան։ Սա կնվազեցնի վարակիչ հիվանդությունների տարածման ռիսկը և կապահովի բարձրորակ անասնապահական մթերքի արտադրություն։