398.94
Մայր աթոռում Սբ. պատարագի ավարտին կատարվել է հայրապետական մաղթանք՝ Գարեգին 2-րդի գահակալության տարեդարձի առիթով
3 րոպեի ընթերցում
ԵՐԵՎԱՆ, 4 ՆՈՅԵՄԲԵՐԻ, ԱՐՄԵՆՊՐԵՍ։ Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց կաթողիկոսի գահակալության 25-րդ տարեդարձի առիթով նոյեմբերի 4-ին Սուրբ պատարագի ավարտին կատարվել է հայրապետական մաղթանք:
Սրբազան արարողություններին ներկա էին Կ․ Պոլսի Հայոց Պատրիարք Ամենապատիվ Տ․ Սահակ արքեպիսկոպոս Մաշալյանը, Հայ Եկեղեցու թեմակալ առաջնորդներ, Գերագույն հոգևոր խորհրդի անդամներ, Մայր աթոռ Սուրբ էջմիածնի միաբաներ և բարեպաշտ հայորդիներ:
Ինչպես «Արմենպրես»-ը տեղեկանում է Մայր աթոռի տեղեկատվական համակարգի տարածած հաղորդագրությունից, Մայր Տաճարում ուխտի Սուրբ Պատարագ է մատուցել նոյեմեբերի 3-ին եպիսկոպոսական ձեռնադրության և օծման արժանացած Արգենտինայի և Չիլիի հայոց թեմի առաջնորդ Գերաշնորհ Տ. Առեն եպիսկոպոս Շահենյանը:
Պատարագիչ սրբազանն իր քարոզում շնորհավորել է Հայոց Հովվապետին օծման ու գահակալության տարեդարձի կապակցությամբ և անդրադարձել Վեհափառ հայրապետի հոգևոր, մշակութային, կրթական ու եկեղեցաշեն գործունեությանը՝ ի մասնավորի նշելով.
«Սիրելի բարեպաշտ ժողովուրդ, 25 տարի առաջ բարեգութ Աստված Հայոց ազգին ցույց տվեց Իր սերը և Իր հոգատարությունը՝ առաքելահաստատ մեր Սուրբ եկեղեցուն տալով բարի, հոգատար, իմաստուն և քաջ հովիվ, ով կարողացավ մեր ազգի համար դժվարին, տագնապալի ու փոթորկալից ժամանակներում անսասան պահել հայի ինքնության և փրկության տապան Հայաստանյայց Առաքելական մեր Սուրբ եկեղեցին՝ դառնալով արժանի հաջորդը Սուրբ Թադեոս ու Սուրբ Բարդուղեմեոս առաքյալների և երկրորդ Լուսավորիչ Սուրբ Գրիգոր Հայրապետի»։
Առեն Եպիսկոպոսը, դիմելով ներկաներին, հրավիրել է ամենքին իրենց սրտագին աղոթքներն ու բարեմաղթանքները միախառնել համայն հայության աղոթքներին՝ հայցելով, որ Տերը քաջառողջ, երկար տարիներ և արդյունաշատ գահակալություն պարգևի Վեհափառ հորն ու անսասան պահի Մայր Աթոռ Սուրբ Էջմիածինն՝ իր նվիրապետական աթոռներով։
Այնուհետև Ամենայն Հայոց հայրապետի օծման և գահակալության 25-րդ տարեդարձի առիթով կատարվել է Հայրապետական մաղթանք՝ հանդիսապետությամբ Կ․ Պոլսի Հայոց Պատրիարք Ամենապատիվ Տ․ Սահակ արքեպիսկոպոս Մաշալյանի:
Բաժանորդագրվեք մեր ալիքին Telegram-ում