ԿԽՄԿ-ն աջակցություն է տրամադրել Սյունիքի և Վայոց ձորի մարզերի որոշ գյուղացիական տնտեսությունների

ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Կարմիր Խաչի միջազգային կոմիտեն (ԿԽՄԿ) Սյունիքի մարզի սահմանամերձ Տեղ համայնքի Խնածախ ու Վաղատուր գյուղերում օգնել է մելիորացնել 60 հա նախկինում չմշակվող հողատարածք, որը դարձել է վարելահող։ 

«Արմենպրես»-ի հաղորդմամբ՝ այս մասին «Ֆեյսբուք»-ի իր էջում տեղեկացրել է ԿԽՄԿ Հայաստանի գրասենյակը։

Ըստ աղբյուրի՝ նաև տրամադրվել է 18 տոննա ցորենի սերմացու ծրագրից օգտվող 43 գյուղացիական տնտեսություններին։

Վայոց ձորի Խաչիկ գյուղում ևս տրամադրվել է աջակցություն. 114 տնային տնտեսությունների բաշխվել է 34 տոննա ցորենի սերմացու` 119 հեկտար վարելահողի համար: