ՀՀ ԲՏԱ նախարարության և «Plug and Play Germany GmbH»-ի համագործակցությամբ հայկական ստարտափների համար կմեկնարկի աքսելերացիոն ծրագիր
8 րոպեի ընթերցում
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի Հանրապետության բարձր տեխնոլոգիական արդյունաբերության նախարարության և «Plug and Play Germany GmbH»-ի նորարարական հարթակի համագործակցության արդյունքում հայկական ստարտափների համար հոկտեմբերի 28-ից կմեկնարկի աքսելերացիոն ծրագիր, որի նպատակն է օգնել և աջակցել ստարտափների գործունեությանը։
«Արմենպրես»-ի հետ հարցազրույցում այս մասին ասաց «Plug and Play Germany GmbH»-ի նորարարական հարթակի կորպորատիվ նորարարության ավագ մենեջեր Ալֆրեդո Գոմես Սորիան` անդրադառնալով Հայաստանի Հանրապետության բարձր տեխնոլոգիական արդյունաբերության նախարարության և «Plug and Play Germany GmbH»-ի միջև համագործակցության, ինչպես նաև նորարարական տեխնոլոգիաների մեջ արհեստական բանականության ներդրման նշանակությանն ու դերին։
Նրա խոսքով՝ այդ համագործակցության շրջանակներում մշակվել է համապարփակ 26-շաբաթյա աքսելերացիոն ծրագիր, որը մեկնարկում է մասնակից հայկական ստարտափների ընտրության գործընթացից։
«Մենք կենտրոնացել ենք հայկական ստարտափների հետ կապ հաստատելու վրա, հասկանալու, թե որտե՞ղ և ի՞նչ փուլում են գտնվում նրանց ծրագրերը, ի՞նչ աջակցության կարիք ունեն նրանք», - ասել է Ալֆրեդո Գոմես Սորիան։
Նա հայտնել է, որ գոյություն ունի հանձնաժողով, որը կգնահատի հայկական ստարտափները՝ ելնելով վերջիններիս շուկայական, ներդրումային և արտադրական ներուժից, իսկ նրանցից լավագույն 20-ը կընտրվեն ծրագրին մասնակցելու համար:
«Ծրագիրը պաշտոնապես մեկնարկում է հոկտեմբերի 28-ին և կշարունակվի մինչև փետրվարի վերջ: Այնպես որ, սա շատ հագեցած ծրագիր է, որը պահանջում է ստարտափների անմիջական մասնակցություն։ Սա ծրագիր է, որը նախագծված է ոչ թե որպես ստարտափ դպրոց, այլ կոչված է այդ վենչուրային, ոլորտային, կորպորատիվ կապերի կառուցմանն օգնելուն, ինչպես նաև օգնելուն, որպեսզի ստարտափները հասնեն համաշխարհային շուկաներ: Ծրագրի միջոցով մեր ունեցած կարևոր տարրերից մեկն այն է, որ մենք պատրաստվում ենք 10 ստարտափներից բաղկացած խումբ տանել Սիլիկոնյան հովիտ՝ մասնակցելու մեր ձմեռային գագաթնաժողովին», - նշել է նա՝ հավելելով, որ տարին երկու անգամ Plug & Play-ում հյուրընկալվում է ամենամեծ գագաթնաժողովը՝ շուրջ 5000-10000 մասնակիցներով, որոնք գալիս են ամբողջ աշխարհից:
«Plug and Play Germany GmbH»-ի կորպորատիվ նորարարության ավագ մենեջերի դիտարկմամբ՝ ծրագիրն, ընդհանուր առմամբ, ունի մի շատ յուրահատուկ տարր, որը տարբերակում է նրան շատ այլ ծրագրերից։
«Ծրագրի ընթացքում բանախոսների, մենթորների 99%-ն այլ երկրներից են՝ Եվրոպայից, ԱՄՆ-ից, Մերձավոր Արևելքից, Սաուդյան Արաբիայից, Սինգապուրից, Չինաստանից», - հայտնել է Ալֆրեդո Գոմես Սորիան՝ ընդգծելով, որ ծրագիրն իրականացվելու է Հայաստանում և այն ոչ թե կրթական դպրոց է, այլ նախատեսված է ստարտափների աճին հետևելու համար:
Նրա խոսքով՝ այն տարրերը, որոնք բացահայտվում են ծրագրի միջոցով, շատ հարմարեցված են յուրաքանչյուր ստարտափին:
«Այնպես որ, դա այն չէ, որ դու գալիս ես դասի, ինչպես համալսարանում, նստում ես աթոռին և մեկ ժամ դասախոսում ես: Այստեղ տարբերությունն այն է, որ ծրագիրը նախագծված է այնպես, որ յուրաքանչյուր ստարտափ ունենա շատ մանրամասն ճանապարհորդություն, որի ընթացքում մասնակիցները կաշխատեն իրենց մենթորների հետ», - ասել է Գոմես Սորիան՝ շեշտելով, որ ծրագրի ավարտից հետո իրականացվելու է աշխատանք՝ հասկանալու, թե որտե՞ղ է հասել տվյալ ստարտափը և ի՞նչ հետագա օգնության կարիք ունի։
Ներկայացնելով Plug & Play-ի ստեղծման պատմությունը՝ նա նշել է, որ այն ունի շուրջ 20 տարվա պատմություն։
«Մեր շտաբը գտնվում է Սիլիկոնյան հովտում: Մենք սկսել ենք 20 տարի առաջ, և մեր գործադիր տնօրենն ու հիմնադիրը ծագումով Իրանից է, որտեղ տեղի ունեցած իսլամական հեղափոխությունից հետո նա լքեց Իրանը և տեղափոխվեց ԱՄՆ։ Այդ ընթացքում, երբ նա դեռ Իրանում էր, ուներ բազմաթիվ արտադրական ընկերություններ, բանկեր, ապահովագրական ընկերություններ և այլն։ Բայց դրանք պետությունը վերցրեց նրանից։ Նրա ընտանիքը տեղափոխվեց ԱՄՆ՝ ամեն ինչ սկսելու զրոյից: Իսկ ԱՄՆ-ում նրանք սկսեցին անշարժ գույքից։ Գնեցին անշարժ գույք, որը հետագայում հյուրընկալել է մի քանի սկսնակ ստարտափների, որոնցից է եղել PayPal անունով ստարտափը, որն այն ժամանակ ունեցել է հինգ կամ վեց աշխատող: Եվ դա առաջին վարձակալներից էր, որ նա ուներ շենքում։ PayPal-ի հեռանալուց հետո նա հյուրընկալեց մեկ այլ ստարտափի, որը Google անունով ընկերություն էր։ Դրանից հետո սկսեցին գալ շատ ստարտափներ ևս», - ասել է Գոմես Սորիան՝ հավելելով, որ այսօրվա դրությամբ Plug & Play-ն առկա է 60 տարբեր վայրերում, ամբողջ աշխարհում աշխատում է 600 կորպորացիաների հետ։
Նրա դիտարկմամբ՝ ընկերությունը կորպորացիաներին օգնում է նորարարության ռազմավարության, գործընթացների, կառավարման, նրանց գործածության սահմանումների հարցում:
«Վերջին երեք-չորս տարիներին մենք հասկացանք, որ ավելի ու ավելի շատ կառավարություններ են շահագրգռված զարգացնելու և խթանելու, ինչպես նաև տեղական ստարտափներին գլոբալ շուկաներ մուտք գործելու հնարավորություն տալու հարցում», - ասել է նա։
Ալֆրեդո Գոմես Սորիան, անդրադառնալով մարդկության ապագայի կամ երկրների զարգացման գործում արհեստական բանականության դերին, կարծիք է հայտնել, որ շատ անորոշություն կա, երբ խոսքը վերաբերում է արհեստական բանականությանը:
«Կարծում եմ՝ մենք արհեստական ինտելեկտի հենց առաջին փուլում ենք։ Կարծում եմ, քանի որ երկրները, կազմակերպությունները և մարդիկ ավելի շատ ներդրումներ են կատարում արհեստական ինտելեկտի մեջ, մենք իսկապես կհասկանանք ուժեղ կողմերը, հնարավորությունները, բայց նաև թույլ կողմերը և անկումները, որոնք արհեստական բանականությունը կարող է բերել մեզ համար: Կա մեկ կարևոր թեմա, երբ խոսքը վերաբերում է արհեստական ինտելեկտին, որի մասին խոսում են բոլորը, դա արհեստական բանականության կարգավորումն է, ինչը մեծ դեր է խաղում», - ասել է նա՝ հավելելով, որ գոյություն ունեն արհեստական բանականության կիրառման բազմաթիվ դեպքեր, երբ այն օգտակար է լինում, օրինակ, բարելավելով առողջապահության ոլորտը կամ կանխատեսելով ջրհեղեղները, եղանակը, անբարենպաստ պայմանները:
Անդրադարձ կատարելով դիտարկմանը, որ կան մարդիկ, ովքեր քննադատաբար են մոտենում արհեստական բանականության զարգացմանը՝ պնդելով, որ դա հանգեցնում է մարդկության դերի նվազմանը՝ Ալֆրեդո Գոմես Սորիան, այդուհանդերձ, նկատել է, որ անհրաժեշտ է դեռևս զգույշ լինել արհեստական ինտելեկտի օգտագործման հարցում։
«Դա կախված է, նրանից, թե ինչպե՞ս և ինչի՞ համար ենք մենք օգտագործում այն: Այն կարող է կա՛մ ավելի մեծ օգուտներ բերել, կա՛մ ավելի մեծ վնաս հասցնել», - եզրափակել է նա։
«Plug and Play Germany GmbH»-ը մասնակցել է հոկտեմբերի 4-7-ը Երևանում անցկացված Նորարարության և տեխնոլոգիաների համաշխարհային կոնգրեսին՝ WCIT2024/DigiTec-ին։
Հեղինակ՝ Դավիթ Մամյան
Լուսանկարները՝ Գևորգ Պերկուպերկյանի