ԼՂ-ից բռնի տեղահանվածների մասնագիտական ուսուցման, աշխատանքի տեղավորման ծրագիրը մեծ պահանջարկ ունի

ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ։ Տարեսկզբից մեկնարկած արցախցիների մասնագիտական ուսուցման, աշխատանքի տեղավորման ծրագրում արդեն 1456 շահառու է ընդգրկվել։ «Արմենպրես»-ի մամուլի սրահում հրավիրված ասուլիսում ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը նշեց, որ ի սկզբանե ծրագիրը նախատեսված էր նախնական 1000 շահառուի համար, սակայն պահանջարկը գնալով մեծացել է և ծրագիրն ընդլայնվել է։ 

«ԼՂ-ից բռնի տեղահանված 1456 մեր հայրենակից արդեն անցել է թե ծրագրի ուսումնական, թե պրակտիկայի բաղադրիչներով։ Հիմնականում պահանջարկը կապված է պրակտիկ բաղադրիչի հետ։ Շահառուների մեծ մասը Երևանից են, այնուհետև Կոտայքից, Արարատից, Տավուշից։ Ոլորտները տարբեր են՝ կոսմետոլոգիա, մենեջմենթ, օպերատորական կամ կադրային գործ, համակարգչային ծրագրեր և այլն»,-ասաց նախարարի տեղակալը։ 

Ծրագիրն իրականացվում է մի քանի բաղադրիչով։ Առաջին բաղադրիչով նախատեսված է մինչև 6 ամիս ուսուցում, որից հետո նոր գործատուն աշխատանքի է վերցնում։ Այդ դեպքում պետությունը փոխհատուցում է ուսման վարձը մինչև 50 հազար դրամի սահմաններում, շահառուին տրամադրում է կրթաթոշակ 50 հազար դրամի չափով, ինչպես նաև աշխատանքի տեղավորվելուց հետո առաջին 3 ամսվա ընթացքում պետությունը գործատուին փոխհատուցում է հարկերը կրկին մինչև 50 հազարի սահմաններում։

Հաջորդը պրակտիկայի բաղադրիչն է, երբ շահառուն աշխատանքային փորձ ձեռք բերելու համար աշխատում է գործատուի մոտ։ Այդ ժամանակ 3 ամսվա համար պետությունը տրամադրում է 160 հազար դրամ, որը ներառում է աշխատավարձ և հարկեր։ Դրանից բացի, արդեն աշխատանքի տեղավորման պարագայում հաջորդող 3 ամսվա համար պետությունը փոխհատուցում է նաև հարկերը մինչև 50 հազար դրամի սահմաններում։ 

Երրորդ բաղադրիչն առաջին երկուսի միավորումն է, երբ գործատուն կարծում է, որ տվյալ անձին աշխատանքի տեղավորելու համար անհրաժեշտ է և՛ ուսուցում, և՛ պրակտիկա։ Այդ դեպքում նախատեսված է մինչև 6 ամսվա ուսուցում։ Պետությունը շահառուին տրամադրում է 50 հազար դրամ կրթաթոշակ, ինչպես նաև ուսման վարձը՝ մինչև 50 հազար դրամի սահմաններում։ Պրակտիկայի ժամանակահատվածի համար պետությունը տալիս է 160 հազար դրամ, որը ներառում է շահառուի աշխատավարձը, հարկերը։ Հաջորդող 3 ամսվա համար ևս հարկերի փոխհատուցում է նախատեսված մինչև 50 հազար դրամի սահմաններում։ 

Պարտադիր պահանջ է ԼՂ-ից բռնի տեղահանված լինելը, վերջին մեկ ամսվա ընթացքում որևէ տեղ աշխատած չլինելը։ Պրակտիկայի համար գործատուների հետ պետք է լինի աշխատանքային պայմանագիր։

Այս ընթացքում քաղաքացիները հարց են բարձրացնում այն մասին, որ Միասնական սոցիալական գրասենյակում իրենց չեն հաշվառում՝ պատճառաբանելով, որ տեղերը սահմանափակ են։ Նախարարի տեղակալը նշեց, որ հնարավոր է տեղերը լրացված լինեն, սակայն սոցիալական գրասենյակը պետք է հաշվառի ծրագրից օգտվել ցանկացողներին, որպեսզի երևա պահանջարկը, դրա հիման վրա էլ նոր որոշումներ լինեն այն ընդլայնելու համար։ Ցանկացած պարագայում, եթե խնդիրներ կան, նախարարի տեղակալը հորդորեց դիմել նախարարություն՝ պարզաբանումներ ստանալու համար։