Podcast-Գիտության շաբաթ. Հայաստանում գիտական ֆանտաստիկան սաղմնային փուլում է. կարևոր քայլ կարող է դառնալ Գիտության փառատոնը
2 րոպեի ընթերցում
ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ։ Հոկտեմբերի 1-ից 6-ը Հայաստանում անցկացվելիք առաջին համազգային Գիտության փառատոնը ուշադրության կենտրոնում է պահելու ոչ միայն գիտության, տեխնոլոգիաների, այլև գիտական ֆանտաստիկայի հանրահռչակումը։ Գիտական ֆանտաստիկան սնուցում է գիտությանը նոր գաղափարներով ու ոգեշնչում նոր բացահայտումների նույն կերպ, ինչպես գիտությունն է սնուցում գիտական ֆանտաստիկային։ Մեկն առանց մյուսի անհնար է։ Հայաստանում գիտաֆանտաստիկ գրականություն պրոֆեսիոնալ մակարդակով գոյություն չունի, չկա համապատասխան գործող գրական դպրոց, սակայն մի խումբ էնտուզիաստների ջանքերով այն աստիճանաբար սաղմնավորվում է։
Հայաստանում հոկտեմբերի 1-6-ն անցկացվելու է առաջին համազգային «Գիտության շաբաթ» միջոցառումը։ Այն անցկացվում է «Գիտուժ» նախաձեռնության կողմից` ՀՀ ԿԳՄՍ նախարարության, Գիտությունների ազգային ակադեմիայի ու Երևանի քաղաքապետարանի հետ համագործակցությամբ։
«Գիտության շաբաթվան» ընդառաջ` «Արմենպրես»-ն ու «Գիտուժ» նախաձեռնությունը սկսել են փոդքաստերի շարք, որի ընթացքում գիտնականները, ճարտարագետները, ՏՏ ոլորտի ներկայացուցիչները խոսում են գիտության ու, մասնավորապես, Հայաստանում գիտության զարգացման, հանրահռչակման ու հեռանկարների մասին։
Փոդքաստի նոր թողարկման հյուրերն են Անվտանգության փորձագետ, «Աստղային հորիզոն» գրական մրցույթի ժյուրիի անդամ Սամվել Մարտիրոսյանը և «ԱրմՔոն» մրցույթի համահիմնադիր Ֆռունզ Հարությունյան։