Ուկրաինան հայտնել է Սումիի մարզում ռուսական հարվածներից 14 վիրավորի մասին
2 րոպեի ընթերցում
![Ուկրաինան հայտնել է Սումիի մարզում ռուսական հարվածներից 14 վիրավորի մասին](http://armenpress.am/resized/480/storage/images/articles/2024/09/12/AM9erVqxZoTEpBnnrtbqZI9QYDdKwCAS70z0Lb2s.webp)
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ։ Ուկրաինայի զինված ուժերը հայտնել են, որ ռուսական կողմը գիշերը երկրի տարբեր շրջանների վրա է արձակել 69 անօդաչու թռչող սարք և հրթիռ։ Սումիի մարզում կա 14 վիրավոր։ «Արմենպրես»-ի փոխանցմամբ՝ այս մասին հաղորդում է BBC-ի ռուսական ծառայությունը։
Նշվում է, որ ըստ Ուկրաինայի ռազմաօդային ուժերի՝ Չեռնիգովի մարզի վրա հարձակում է իրականացվել երկու «Իսկանդեր-Մ» բալիստիկ հրթիռներով, որոնք արձակվել են Կուրսկի մարզից, ինչպես նաև «Խ-59/69» ավիացիոն հրթիռով, որն արձակվել է Բրյանսկի մարզից։
Բացի այդ, Սև ծովի Զմեինի կղզու վրա է արձակվել երկու թևավոր հրթիռ։
Միևնույն ժամանակ Սումիի մարզային դատախազությունը հայտնել է, որ Կոնոտոպ քաղաքին ԱԹՍ-ների հարվածի հետևանքով 14 մարդ է վիրավորվել։ Ըստ դատախազության՝ լույս սեպտեմբերի 12-ի գիշերը հարձակման են ենթարկվել կարևոր և քաղաքացիական ենթակառուցվածքի օբյեկտներ, վնասվել է յոթ բազմաբնակարան շենք, մեկ մասնավոր տուն, ինչպես նաև բժշկական և ուսումնական հաստատություններ։
Ըստ Կոնոտոպի քաղաքապետարանի՝ հարձակումից հետո քաղաքում էլեկտրամատակարարման խափանումներ են առաջացել, քանի որ էներգետիկ ենթակառուցվածքը լուրջ վնասներ է կրել։
Ռուսաստանի պաշտպանության նախարարությունն իր հերթին հայտնել է, որ հակաօդային պաշտպանության միջոցները խոցել են ամերիկյան արտադրության HIMARS ռեակտիվ համակարգի երկու արկ և 59 ԱԹՍ։