SpaceX-ի կողմից ուղեծիր ուղարկված ոչ պրոֆեսիոնալ տիեզերագնացները դուրս են եկել բաց տիեզերք
1 րոպեի ընթերցում
![SpaceX-ի կողմից ուղեծիր ուղարկված ոչ պրոֆեսիոնալ տիեզերագնացները դուրս են եկել բաց տիեզերք](http://armenpress.am/resized/480/storage/images/articles/2024/09/12/eDzYoZBVO2mIMmSi9B8AYCUPINLVt2uvZZT1myqG.webp)
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ։ SpaceX ընկերության Polaris Dawn առաքելության մասնակից երկու ոչ պրոֆեսիոնալ տիեզերագնացներն առաջին անգամ դուրս են եկել բաց տիեզերք, մինչ մյուս երկուսը դիտել են դա տիեզերանավի ներսից։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
41-ամյա միլիարդատեր Ջարեդ Այզեքմենը, որն արդեն մասնակցել է Inspiration4 առաքելությանը, և SpaceX-ի ինժեներ 30-ամյա Սառա Ջիլիսը դարձել են առաջին պետական ծառայող չհանդիսացող անձինք, որոնք դուրս են եկել բաց տիեզերք։
Այս առաքելության համար SpaceX-ի փորձարկած տեխնոլոգիաները, այդ թվում՝ Crew Dragon տիեզերանավի խցիկից ամբողջ ճնշման բացթողումը և ավելի բարակ, նոր դիզայնով տիեզերական կոստյումները կարող են օգտագործվել հետագա մասնավոր առաքելությունների համար։ Սա բավական ռիսկային նախաձեռնություն էր Իլոն Մասկի ընկերության համար, որը միակ մասնավոր ընկերությունն է, որ կարողանում է Երկրի ուղեծիր ուղարկել մարդկանց։
Բաց տիեզերքում գտնվելը տևել է ընդամենը 30 րոպե, սակայն նախապատրաստվելու և գործընթացն ավարտելու համար պահանջվել է, ընդհանուր առմամբ, 1 ժամ 46 րոպե։
Polaris Dawn առաքելությունն ուղեծիր էր մեկնել սեպտեմբերի 10-ին։