Ucom ընկերության և «Արևորդի» ՀԿ-ի շնորհիվ արևային էներգիան հասանելի կլինի Սյունիքի սահմանամերձ շրջաններում

ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ։ Ucom ընկերությունը «Արևորդի» ՀԿ-ի հետ համատեղ Սյունիքի մարզի Կապան համայնքի Շիկահող բնակավայրում կայուն  էներգիայի ներդրման հերթական ծրագիր է իրականացրել: 

Շիկահող բնակավայրի մշակույթի տան տանիքին տեղադրվել է 10.44 կՎտ/ժ դրվածքային հզորության արևային կայան, որը կապահովի թե՛ մշակույթի տան, թե՛ վարչական շենքի և թե՛ բնակավայրում առկա արտաքին լուսավորության էլեկտրաէներգիայի ծախսը։ 

Շիկահողի մշակույթի տունը չափազանց կարևոր է համայնքի համար, մասնավորապես, այնտեղ է գտնվում բնակավայրի գրադարանը։ Առաջիկայում պլանավորվում է շենքի վերանորոգումը, որից հետո բնակիչները կկարողանան այն օգտագործել տարբեր միջոցառումների, մշակութային խմբակների և այլնի համար։ 

«Մենք մեծ կարևորություն ենք տալիս շրջակա միջավայրի կայուն լուծումներին և ուրախ ենք, որ մեր համագործակցության շնորհիվ կանաչ էներգիան հասանելի կդառնա Սյունիքի սահմանամերձ Շիկահողում: Սա մեր առաջին նախագիծն է Սյունիքում, և այսպիսով մենք ոչ միայն Շիկահողին կայուն էներգիա ենք տրամադրում, այլ նաև օգնում ենք գումար տնտեսել գյուղի ենթակառուցվածքները բարելավելու համար», - նշել է Ucom ընկերության գլխավոր տնօրեն Ռալֆ Յիրիկյանը։

«Այս նախագիծը ոչ միայն աջակցում է համայնքային ռեսուրսների խնայողությանը, այլև նվազեցնում է շրջակա միջավայրի վրա ազդեցությունը՝ խրախուսելով վերականգնվող էներգիայի օգտագործումը: Արդյունքում, համայնքը կարող է ապավինել ավելի մաքուր և կայուն էներգիայի աղբյուրների վրա, ինչը կնպաստի երկարաժամկետ տնտեսական և էկոլոգիական կայունության ապահովմանը, հատկապես սահմանամերձ բնակավայրերում», - ասել է «Արևորդի» ՀԿ-ի տնօրեն Սոնա Քալանթարյանը:

«Արևային էներգիայի ներդրումը մեր համայնքում նպաստում է ջեռուցման խնդրի լուծմանը և զգալիորեն կրճատում է ծախսերը: Այժմ երկու շենքի և փողոցային լուսավորությունը ապահովվում է տեղադրած սարքավորումներով: Նման նախագծերի շարունակականությունը կարևոր է: Բնակավայրը նախկինում ջեռուցվում էր վառելափայտով՝ սպառելով Շիկահողի արգելոցի միջոցները: Այս կայանները կօգնեն ավելի կայուն և արդյունավետ դարձնել համայնքը», - նշել է Շիկահող համայնքի վարչական ղեկավար Զորիկ Նավասարդյանը:

«Արևորդի» ՀԿ-ի և Ucom-ի համագործակցության շրջանակներում արևային կայանների տեղադրման որոշումը պատահական չէ: Կազմակերպությունները առաջնահերթությունը տալիս են բնապահպանական կայուն լուծումներին, որոնք իրենց հերթին համայնքի համար ապահովում են տնտեսական կայունության լուծումներ։