Իսրայելի պատվիրակությունը մեկնել է Դոհա՝ հրադադարի շուրջ բանակցությունները շարունակելու
2 րոպեի ընթերցում
![Իսրայելի պատվիրակությունը մեկնել է Դոհա՝ հրադադարի շուրջ բանակցությունները շարունակելու](http://armenpress.am/resized/480/storage/images/articles/2024/08/28/KQjBgq9AehS5hbrfZTbujr83irPYPdvZfm1QZJOY.webp)
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ։ Իսրայելի պատվիրակությունը մեկնել է Դոհա, որպեսզի շարունակի Գազայի հատվածում հրադադարի և պատանդների վերադարձի շուրջ բանակցությունները։ «Արմենպրես»-ի փոխանցմամբ՝ այս մասին հաղորդում է JNS պարբերականը՝ վկայակոչելով վարչապետ Բենիամին Նեթանյահուի գրասենյակի հայտարարությունը։
Պատվիրակությունը, որի կազմի մեջ են մտնում Իսրայելի պաշտպանության բանակի, Մոսադի և Իսրայելի անվտանգության գործակալության պաշտոնյաները, Կահիրեում բանակցություններից վերադարձել է օգոստոսի 27-ին։
Կահիրեում բարձր մակարդակով բանակցություններն ավարտվել էին օգոստոսի 25-ին՝ առանց շոշափելի արդյունքների։
Ըստ Իսրայելական Channel 12 լրատվամիջոցի՝ օգոստոսի 28-ին Իսրայելի պատվիրակությունը Դոհայում կհանդիպի Եգիպտոսի, Կատարի և ԱՄՆ-ի ներկայացուցիչների հետ, որոնք շարունակում են բանակցությունները և աշխատում են Իսրայելի և պաղեստինյան ՀԱՄԱՍ խմբավորման հետ, որպեսզի հասնեն Գազայի հատվածում հրադադարի և պատանդների վերադարձի շուրջ համաձայնության։
Գազայի հատվածում պատերազմը սկսվել է 2023 թ. հոկտեմբերի 7-ին պաղեստինյան ՀԱՄԱՍ արմատական շարժման զինյալների՝ Իսրայել ներխուժումից հետո, որի հետևանքով Իսրայելում զոհվել է 1200 մարդ։ Շուրջ 250 մարդ գերեվարվել էր. նրանց մի մասը վերադարձվել է նոյեմբերի վերջին հաստատված 1-շաբաթյա հրադադարի ժամանակ։ Գազայի առողջապահական գերատեսչության տվյալներով՝ հակամարտության սկզբից ի վեր Գազայի հատվածին հասցված իսրայելական հարվածների զոհերի թիվը հասել է 40 534-ի, վիրավորվել է ավելի քան 93 700 մարդ։