Իրանում ձերբակալել են «Իսլամական պետության» 14 զինյալի
1 րոպեի ընթերցում
![Իրանում ձերբակալել են «Իսլամական պետության» 14 զինյալի](http://armenpress.am/resized/480/storage/images/articles/2024/08/23/RfzTP2V88jodEA93j98gvHIRtKGGeVDxb9RjSpRh.webp)
ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: Իրանի հետախուզության նախարարությունը հայտնել է հանրապետությունում 14 ահաբեկչի ձերբակալման մասին, որոնք հանդիսանում են «Իսլամական պետություն» խմբավորման «Վիլայաթ Խորասան» մասնաճյուղի անդամներ։ «Արմենպրես»-ի փոխանցմամբ՝ այս մասին հաղորդում է Mehr գործակալությունը։
Նշվում է, որ ահաբեկչական կազմակերպության անդամներին հայտնաբերել և ձերբակալել են Թեհրանի, Ալբորզի, Ֆարսի և Խուզեստանի նահանգներում։
Ըստ Հետախուզության նախարարության՝ ձերբակալվածներն «ապօրինի ներթափանցել են երկիր վերջին մի քանի օրվա ընթացքում և մտադրվել են իրականացնել ահաբեկչական գործողություններ»։ Զինյալների կեսը ձերբակալվել է հանրապետության հարավի Ֆարսի նահանգում։
Հուլիսի 24-ին Իրանի հետախուզության նախարար Էսմայիլ Խատիբը հայտնել էր, որ իր աշխատակիցները ձերբակալել են «Իսլամական պետության» երկու պարագլխի և ևս 10 ահաբեկչի: