Պետքարտուղարությունը հավանություն է տվել Ռումինիային 592 մլն դոլարի «օդ-օդ» դասի հրթիռների վաճառքին
1 րոպեի ընթերցում
![Պետքարտուղարությունը հավանություն է տվել Ռումինիային 592 մլն դոլարի «օդ-օդ» դասի հրթիռների վաճառքին](http://armenpress.am/resized/480/storage/images/articles/2024/08/23/ZtFrsMt7dBkOCL4mzc15erj2p9Dqt5GaH87Ct39q.webp)
ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: ԱՄՆ պետքարտուղարությունը հավանություն է տվել Ռումինիային 592 միլիոն դոլարի AIM-120 «օդ-օդ» դասի միջին հեռահարության հրթիռների հնարավոր վաճառքին:
«Արմենպրես»-ի փոխանցմամբ՝ այս մասին հաղորդագրություն է տարածել ԱՄՆ պաշտպանության նախարարության Անվտանգության բնագավառում համագործակցության գործակալությունը, որը պատասխանատու է միջկառավարական պայմանագրերով արտասահման ռազմական տեխնիկայի և զենքի մատակարարումների համար:
Ըստ հաղորդագրության՝ Ռումինիայի իշխանությունները AIM-120C-8 (AMRAAM) «օդ-օդ» դասի միջին հեռահարության մինչև 186 կատարելագործված հրթիռների, 4 ուղղորդման սեկցիայի, ինչպես նաև օժանդակ սարքավորումների գնման դիմում են ներկայացրել: Հնարավոր վաճառքի ընդհանուր գումարը կկազմի 592 մլն դոլար:
Նշվում է, որ առաջարկվող վաճառքը կաջակցի ԱՄՆ-ի արտաքին քաղաքականության և ազգային անվտանգության նպատակներին՝ ՆԱՏՕ-ի դաշնակցի անվտանգությունը բարելավելու միջոցով։