2 րոպեի ընթերցում
ԵՐԵՎԱՆ, 19 ՕԳՈՍՏՈՍԻ, ԱՐՄԵՆՊՐԵՍ: Հայաստանի Հանրապետության նախագահ Վահագն Խաչատուրյանը ցավակցական հեռագիր է հղել շվեցարահայ բարերար, Հայաստանի ազգային հերոս Տիգրան Իզմիրլյանի մահվան կապակցությամբ:
«Արմենպրես»-ի փոխանցմամբ՝ հեռագրում ասվում է.
«Մեծ ցավով տեղեկացա Հայաստանի ազգային հերոս, հայ ժողովրդի արժանավոր զավակ և բարերար Տիգրան Իզմիրլյանի մահվան մասին:
Պարոն Իզմիրլյանի և «Իզմիրլյան» հիմնադրամի կողմից Հայաստանում իրականացված բազմաթիվ նախաձեռնություններն ու բարեգործական ծրագրերը իրենց ուրույն դերն ունեն մեր երկրում կրթության, առողջապահության, տնտեսության և բազմաթիվ այլ բնագավառների զարգացման գործում:
Մեծ բարերարի գործունեությունը Հայաստանի Հանրապետության հանդեպ միանշանակ սիրո ցայտուն դրսևորում էր, ինչի համար էլ նա արժանվույնս վաստակել էր մեր պետության ազգային հերոսի կոչումը, ինչպես նաև արժանացել բազմաթիվ պետական բարձր պարգևների և անշուշտ, մեր ժողովրդի երախտապարտությանն ու հարգանքին: Տիգրան Իզմիրլյանի հիշատակը միշտ վառ կմնա Հայաստանի ժողովրդի սրտում:
Ծանր կորստի պահին իմ վշտակցությունն եմ հայտնում Իզմիրլյան ընտանիքին, Տիգրան Իզմիրլյանի բոլոր բարեկամներին և գործընկերներին՝ մաղթելով նրանց համբերություն և տոկունություն»: