Մեծ Բրիտանիայի մի շարք քաղաքներում տեղի կունենան ռասիզմի դեմ բողոքի ցույցեր
1 րոպեի ընթերցում
![Մեծ Բրիտանիայի մի շարք քաղաքներում տեղի կունենան ռասիզմի դեմ բողոքի ցույցեր](http://armenpress.am/resized/480/storage/images/articles/2024/08/10/yUYmeylyJhNU9xMiqAyu4LZmXY4ZrXvw8TmG7zq9.webp)
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: Մեծ Բրիտանիայում միգրանտների և մուսուլմանների դեմ մի քանի օր շարունակվող անկարգությունների ֆոնին բազմաթիվ խոշոր քաղաքներում տեղի կունենան ռասիզմի դեմ ցույցեր:
«Արմենպրես»-ի փոխանցմամբ՝ այդ մասին օգոստոսի 10-ին հայտնել է Sky News պարբերականը։
«Ռասիզմի դեմ բողոքներն այսօր տեղի կունենան ամբողջ երկրում», - ասվում է հեռուստաալիքի հաղորդագրության մեջ:
Ըստ աղբյուրի՝ նախօրեին Մեծ Բրիտանիայի վարչապետ Քիր Սթարմերը իրավապահ ուժերին կոչ է արել այս հանգստյան օրերին բարձր պատրաստվածություն պահպանել՝ բողոքի ակցիաների ժամանակ հերթական անկարգությունների դեպքում:
Բողոքի ցույցերը Միացյալ Թագավորության տասնյակ քաղաքներում արդեն շարունակվում են ավելի քան մեկ շաբաթ։ Խռովությունների առիթ է դարձել հուլիսի 29-ին Սաութփորթ քաղաքում երեխաներին թիրախավորող դանակահարությունը, որի հետևանքով երեք աղջիկ է զոհվել, ևս 8 երեխա և 2 չափահաս՝ վիրավորվել։ ԶԼՄ-ներում տեղեկություններ են տարածվել, որ դանակահարությունն իրականացնող 17-ամյա երիտասարդի ծնողները Ռուանդայից են: