«Նոր գիրք»-30/24. Քիքոձե, Բաուեր, դե Բոնո

ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ: «Արմենպրես» լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին: Այս շաբաթ «Արմենպրես»-ն առանձնացրել է 2024 թվականին հրատարակված և հանրության դատին հանձնված տարբեր հրատարակչությունների ուշագրավ գրքեր՝ տարբեր խորագրերի ներքո:

Թարգմանական գրականություն 

Արչիլ Քիքոձե, «Մողեսը տապանաքարին»

Արչիլ Քիքոձեի «Մողեսը տապանաքարին» վեպը խորհրդանիշներով եւ ակնարկներով լի տեքստ է։ Այն պատկերում է անցյալի եւ ներկայի, հիշողության եւ մոռացության, մահվան եւ կյանքի` մշտապես արդիական հակամարտությունը։

Պատմողը գիտակցաբար հրաժարվում է մոռանալուց մանկության ցնցումները, երիտասարդության հիասթափություններն ու ցավերը, նույնիսկ եթե դրանք անտանելի են դարձնում իր գոյությունը։

Գլխավոր հերոսն անցյալի պատկերներով, տխրությամբ, երազանքներով, սիրով ու մենությամբ լի մարդ է, որի կյանքը նման է խճանկարի ցրված կտորների։ Նրա մտքերի, զգացմունքների եւ հույզերի փոթորկում ընդգծվում են վեպի հիմնական դրամատուրգիական գծերը։ Առաջինը պատմողի ընկերոջ՝ նկարիչ Գիգոյի ողբերգական կյանքն ու մահն է, երկրորդը՝ հերոսի եւ իր մոր նուրբ հարաբերությունները։ Թարգմանիչ՝ Ասյա Դարբինյան, խմբագիր՝ Արմեն Սարգսյան։ Գիրքը լույս է ընծայել «Վերնատուն» հրատարակչությունը։  

Մանկապատանեկան գրականություն 

Յանա Բաուեր, «Ինչպե՞ս բոբոյից ազատվել»

Քո սենյակում է՞լ է բոբո բուն դրել: Չլինի՞ չաղ է, միաչքանի ու սուր- սուր ճանկավոր: Ուրեմն հաստատ ԲՌԻ տեսակից է: Չվախենա՛ս. փողային նվագախումբը դրանց ահուսարսափն է: Քայլերգ լսեց թե չէ, պու՛կ կփախչի: Բայց մեկ էլ տեսար՝ ԲՌԻ չլինի, այլ սրատամ, կամ ՓՌՉՈՏ, կամ մի ուրիշ տեսակի... Սրանց դեմ էլ ճար կա. Օտտո Մորեխը հաստատ կգտնի: Սլովերենից թարգմանեց Արմինե Վրտեսկա- Փիլոյանը։ Խմբագիր՝ Նունե Թորոսյան։ Գիրքը լույս է ընծայել «Անտարես»-ը:

Փաստավավերագրական գրականություն 

Էդվարդ դե Բոնո, «Նոր մտքի ծնունդը» 

Բրիտանացի հոգեբան, փորձագետ Էդվարդ դե Բոնոյի աշխատությունները վերաբերում են ոչ ստանդարտ մտածողությանը: Ամենուրեք տրամաբանվածություն որոնելը, իրադրությունները կարծրացած մտածողությամբ գնահատելը հաճախ ցանկալի հետևանք չի ունենում: Հեղինակի այս գիրքը սովորեցնում է, թե ինչպես ոչ շաբլոն մտածողությամբ հասնել ցանկալի արդյունքների: Գիրքը լույս է ընծայել «Դարակ»-ը:

«Նոր գիրք»-ը ներկայացրեց Ռոզա Գրիգորյանը