Անգլիայում 39 ոստիկան է վիրավորվել զանգվածային դանակահարության հետ կապված անկարգությունների ժամանակ
2 րոպեի ընթերցում
![Անգլիայում 39 ոստիկան է վիրավորվել զանգվածային դանակահարության հետ կապված անկարգությունների ժամանակ](http://armenpress.am/resized/480/storage/images/articles/2024/07/31/3KNSirUIWxgFHm1MX4bZVhxq6vWT1icdDehkepDw.webp)
ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ։ Անգլիայի Սաութփորթ քաղաքում զանգվածային դանակահարության զոհերի հիշատակի արարողությանը զուգահեռ անկարգություններ են տեղի ունեցել, որոնց հետևանքով 39 ոստիկան է վիրավորվել։ «Արմենպրես»-ի փոխանցմամբ՝ այս մասին հաղորդում է BBC-ն։
Անկարգությունները տեղի են ունեցել հիշատակի արարողության վայրից մի քանի փողոց հեռավորության վրա գտնվող մզկիթի մոտ։ Ցուցարարներն աղյուսներ են նետել մզկիթի վրա, մեքենաներ և աղբարկղեր են այրել, վնաս են հասցրել տեղի հանրախանութներից մեկին։
Ըստ շտապօգնության ծառայության՝ 27 ոստիկան տեղափոխվել է հիվանդանոց, 12-ը բուժօգնություն են ստացել տեղում։
Անկարգությունների պատճառով Սաութփորթի տվյալ հատվածում 24-ժամյա հատուկ ռեժիմ է մտցվել, որն իրավապահներին իրավունք է տալիս կանգնեցնել և խուզարկել մարդկանց։
Մերսիսայդ կոմսության ոստիկանությունը նաև հայտնել է, որ Սաութփորթում ոստիկանության լրացուցիչ ուժեր կտեղակայվեն։
Սաութփորթում հուլիսի 29-ին երեխաների պարի միջոցառման ժամանակ տեղի ունեցած զանգվածային դանակահարության հետևանքով զոհվել է 3 աղջիկ՝ 6, 7 և 9 տարեկան։ Վիրավորվել է 5 երեխա և 2 չափահաս, որոնք գտնվում են ծայրահեղ ծանր վիճակում։
17-ամյա կասկածյալը, որը ծնվել է Քարդիֆում, ձերբակալված է: Տեղեկություններ էին տարածվել, թե երիտասարդը մուսուլման է։ Սակայն ոստիկանությունը հայտնել է, որ կասկածյալի անձի շուրջ ենթադրությունները ոմանք օգտագործում են փողոցներում անկարգություններ անելու համար։
Մեծ Բրիտանիայի վարչապետ Քիր Սթարմերը նույնպես այցելել է Սաութփորթ և ծաղիկներ դրել հուլիսի 29-ին տեղի ունեցած հարձակման զոհերի հիշատակին։