Համագործակցություն՝ ուղղված մանկական առողջապահության զարգացմանը. «Ուիգմոր»-ում մեկնարկել է «Valley Children’s healthcare» (ԱՄՆ) մանկական հիվանդանոցի մասնագիտական այցը
7 րոպեի ընթերցում
![Համագործակցություն՝ ուղղված մանկական առողջապահության զարգացմանը. «Ուիգմոր»-ում մեկնարկել է «Valley Children’s healthcare» (ԱՄՆ) մանկական հիվանդանոցի մասնագիտական այցը](http://armenpress.am/resized/480/storage/images/articles/2024/07/09/a6d6qZP5LzBtj0b6x5A8voRLxcPUqCBSqY8gXudF.webp)
ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: «Ուիգմոր կանանց և երեխաների հիվանդանոց»-ում արդեն մեկ շաբաթ ընթանում է ԱՄՆ լավագույն մանկական բուժհաստատություններից մեկի՝ «Valley Children’s Healthcare» հիվանդանոցից ժամանած առաջին մասնագիտական պատվիրակության այցը։ Սա ամերիկյան պատվիրակության անդրանիկ այցն է Հայաստան՝ ուղղված «Ուիգմոր»-ի մասնագետների հետ փորձի փոխանակման և համատեղ աշխատանքին։ Այցի առաջին օրը հյուրերը ծանոթացան «Ուիգմոր»-ի պատմությանը, առաքելությանը և զարգացման տեսլականին, քննարկվեց համագործակցության ընթացիկ շրջանակը և հեռանկարները։
«Արմենպրես»-ի հաղորդմամբ, շրջայցի ընթացքում նահանգներից ժամանած բժիշկները ծանոթացան անձնակազմի հետ, ծառայություններին և հիվանդանոցի տեխնիկական հագեցվածությանը, այնուհետև անցան այցի շրջանակներում նախատեսված հագեցած օրակարգին։ Հուլիսի 8-ին «Ուիգմոր»-ում բացվեց համագործակցության հուշատախտակը:
«Ուիգմոր Գրուփ»-ի հիմնադիր տնօրեն, վնասվածքաբան-օրթոպեդ, ողնաշարի վիրաբույժ Զավեն Քոլոյանը նշեց՝ ԱՄՆ առաջատար մանկական հիվանդանոցի հետ համագործակցության գլխավոր նպատակն է էականորեն բարելավել երկրում մատուցվող մանկական առողջապահական ծառայությունների որակը։
«Հայաստանյան մանկաբուժության ոլորտի համար սա եզակի իրադարձություն է, միջազգային այս համագործակցությունը ներառում է բժիշկների շարունակական փորձի փոխանակում, բուժքույրական կրթություն, ինչպես նաև որակի և բուժառուների անվտանգության միջազգային չափանիշների ներդրում Հայաստանի հիվանդանոցային կառավարման ոլորտում»,-ասաց Զավեն Քոլոյանը։
«Valley Children’s Healthcare»-ի բժշկական հարցերով և բժիշկների առողջության և զարգացման գծով փոխնախագահ, մանկական վարակաբան Քերըն Դալն ընդգծեց, որ սա շատ եզակի միջազգային համագործակցություն է երկու հաստատությունների միջև, որոնք աշխատում են բարձրացնել մանկական առողջապահության որակը Հայաստանում և աշխարհում:
«Այն միջազգային այլ համագործակցություններից տարբերվում է նրանով, որ սա զուտ բուժառուներին ուղղված առողջապահական խնամք չէ, այլ համակարգային բարելավում: Մենք սրանով ցանկանում ենք փոփոխություն մտցնել և բարձրացնել բուժառուների անվտանգությունը, բուժօգնության որակը: Կարծում ենք, և հուսով ենք, որ այս համագործակցության ընթացքում կկարողանանք օգնել ներդնել այս ամենը «Ուիգմոր»-ում և Հայաստանում: Այստեղ շատ կարևոր է նաև ուսուցանելու գործընթացի առկայությունը, որը նաև լավ հնարավորություն է երկու կողմերին տեսնելու, թե ինչպիսի իրականություն է այլ երկրներում»,-նշեց նա։
Համագործակցության հուշագրի ստորագրումից ի վեր, «Ուիգմոր կանանց և երեխաների հիվանդանոց»-ից արդեն երեք մասնագիտական խումբ է մեկնել ԱՄՆ վերապատրաստման տարբեր մասնագիտացումներով՝ մանկական անհետաձգելի բուժօգնության բժիշկներ, մանկաբույժ, մանկական նյարդաբան և նյարդավիրաբույժ, դիմածնոտային վիրաբույժ, ճառագայթաբան, ինչպես նաև ադմինիստրատիվ անձնակազմ։
Ֆրեզնոյի հայ համայնքի ներկայացուցիչ, Kaiser Permanente հիվանդանոցի նախկին ղեկավար, ուրոլոգ Վարուժան Ալտեբարմակյանը նշեց, որ շատ ուրախ է այս կարևոր համագործակցության մի մասը, ինչպես նաև այս երկու հաստատություններն իրար կապող ուժը լինելու համար:
«Ուրախ եմ նաև հուշատախտակի բացման արարողությանը մասնակցելու համար: Ես այս համագործակցությունը համեմատում եմ մեդալի հետ, որը երկու կողմ ունի, և սովորաբար մենք միշտ մտածում ենք մի կողմը հաղթող է՝ մյուս կողմը պարտվող, բայց մեր դեպքում մեդալի երկու կողմերն էլ հաղթող են: «Valley Children’s Healthcare»-ը հաղթող է այն առումով, որ առաջին հաստատությունն է, որ սկսում է նմանատիպ գլոբալ առողջապահական նախաձեռնություն, բերում է փոփոխություններ առողջապահության համակարգում, իսկ «Ուիգմոր կանանց և երեխաների հիվանդանոց»-ը հաղթում է այն իմաստով, որ փորձի փոխանակման հնարավորություն է ստանում՝ ծանոթանալու «Valley Children’s healthcare»-ի բժիշկների փորձառությանը, հմտություններին և գիտելիքներին»,-ասաց Ալտեբարմակյանը։
«Valley Children’s»-ի պատվիրակության անդամ՝ մանկական անհետաձգելի բուժօգնության բժիշկ Ջուլիաննա Սահուրիան ընդգծեց՝ մեկ շաբաթվա ընթացքում հասցրել են միասին աշխատել և միմյանցից մեծ փորձ ու հմտություններ վերցնել:
Այցի ընթացքում «Ուիգմոր»-ում տեղի ունեցավ նաև «Մանկական նյարդաբանության և նյարդավիրաբուժության արդի խնդիրներ» թեմայով գիտաժողովը, որի ընթացքում «Ուիգմոր»-ի մասնագետներից բացի ելույթ ունեցան «Valley Children’s Healthcare» (ԱՄՆ) հիվանդանոցի նյարդաբանական և նյարդավիրաբուժական ծառայությունների ղեկավարներ Սեզար Սանթոսը և Պատրիսիա Քլերկինը, ինչպես նաև մանկական նյարդաբան Սթիվեն Էրիշը։
«Valley Children’s »-ի և «Ուիգմոր»-ի համագործակցությունը հիմնվել է 2023 թվականին երկկողմ հուշագրի ստորագրմամբ՝ ուղղված մանկական առողջապահության զարգացմանը Հայաստանում: Հուշագիրը ենթադրում է հայ և ամերիկացի բժիշկների փորձի փոխանակում, բուժքույրական կրթություն և վերապատրաստում, որակի և բուժառուների անվտանգության մշակույթի զարգացում, ինչպես նաև՝ համագործակցություն ֆորմալ կրթական ծրագրերի և համատեղ հետազոտական ծրագրերի շուրջ։
Ըստ երկու կողմերի մասնագետների՝ համակարգային բարելավում և կայուն զարգացում որևէ ոլորտում հնարավոր չէ առանց շարունակական կրթության և լավագույն փորձի տեղայնացման, և այս համագործակցության զարգացումը դրա վառ արտահայտումն է։