Սոցիոլոգիական հարցման համաձայն՝ Ավստրիայի յուրաքանչյուր երկրորդ բնակիչը ֆինանսական դժվարություններ ունի

ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ։ Ավստրիացիների շրջանում անցկացված սոցիոլոգիական հարցումը ցույց է տվել, որ նրանց 52%-ը ֆինանսական դժվարություններ ունի: Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։ 

«Բոլոր դաշնային նահանգների բնակիչների միայն 48%-ն է ասել, որ իրենց մոտ եղած գումարը բավարար է։ Ցածր կրթական մակարդակ ունեցող մարդկանց շրջանում ցուցանիշն էլ ավելի ցածր է՝ 42%», - նշված է հաղորդագրության մեջ։

Նույն հարցման համաձայն՝ ավստրիացիների մեծամասնությունը մռայլ հեռանկարներ ունի նաև առաջիկա տասներկու ամիսների համար։

Օրինակ՝ հարցվածների 76%-ը կարծում է, որ գալիք տարում եկամուտը չի ավելանա։ Բացի այդ, 67%-ն ակնկալում է, որ գործազրկության մակարդակը կշարունակի աճել։ 55%-ն էլ ակնկալում է գնաճի աճ։ Հարցվածների գրեթե կեսը (46%) ակնկալում է հարկերի աճ։ 

Հարցումը նաև ցույց է տվել, որ ավստրիացիների 76%-ն ակնկալում է սննդամթերքի գների բարձրացում, 71%-ը՝ հագուստի, 66%-ը՝ առողջապահական, իսկ 52%-ը՝ վարձավճարների և վարկերի աճ:

Բացի այդ, ավստրիացիներին հարցրել են, թե ինչն են նրանք համարում գների բարձրացման պատճառ։ Հարցվողները մի քանի պատճառներ են նշել։ Այսպես՝ 77%-ը կարծում է, որ պատճառը դաշնային կառավարության քաղաքականության մեջ է, 70%-ը որպես պատճառ նշել է համաշխարհային տնտեսությունը, 69%-ը՝ Ուկրաինայի հակամարտությունը, 60%-ը՝ ներգաղթը։