ԳԱՎԱՌ, 28 ՀՈՒՆԻՍԻ, ԱՐՄԵՆՊՐԵՍ։ Գեղարքունիքի մարզի Վարդենիս համայնքի Ախպրաձոր գյուղում ՀՀ կառավարության կողմից 2023 թվականին իրականացվող սուբվենցիոն ծրագրերի շրջանակներում կառուցվել է ոռոգման ջրատարի և լուսավորության արտաքին ցանցեր։
Սուբվենցիոն 2 ծրագրերի իրականացման նպատակով ներդրվել է 34 միլիոն 946 հազար 470 դրամ, որից 24 միլիոն 462 հազար 529 դրամը ՀՀ կառավարության, 10 միլիոն 483 հազար 471 դրամը Վարդենիսի համայնքապետարանի մասնաբաժինն է։
Ախպրաձորի ոռոգման ջրատարի կառուցման պայմանագրային արժեքը կազմում է 29 միլիոն 900 հազար դրամ, որի 70 տոկոսը հատկացրել է ՀՀ կառավարությունը, 30 տոկոսը՝ Վարդենիսի համայնքապետարանը։ Ծրագրի իրականացման արդյունքում Ախպրաձորում ոռոգման ջրատարի արտաքին ցանց է կառուցվել՝ երկաթյա խողովակաշարով, 450 գծամետր երկարությամբ։ Շինարարական աշխատանքները մեկնարկել են 2023 թվականի օգոստոսից և ավարտվել նույն տարվա դեկտեմբերին։
Ծրագրի իրականացման շնորհիվ ապահովվել է Ախպրաձորի բոլոր տնտեսությունների տնամերձ հողամասերի ոռոգման ջրի մատակարարումը։ 2024 թվականի ոռոգման շրջանի սկզբից ջուրն արդեն տնտեսություններին կմատակարարվի երկաթյա բոլորովին նոր ու փակ խողովակաշարով, որի արդյունքում գյուղի բոլոր տնամերձերը, շուրջ 15 հեկտար, ոռոգման ջուրը ստանում են ժամանակին եւ անկորուստ։
Ախպրաձորի արտաքին լուսավորության ցանցի կառուցման ծրագրի պայմանագրային արժեքը կազմում է 5 միլիոն 46 հազար 470 դրամ, որի 70 տոկոսը հատկացրել է ՀՀ կառավարությունը, 30 տոկոսը՝ Վարդենիսի համայնքապետարանը։
Շինարարական աշխատանքները մեկնարկել են 2023 թվականի օգոստոսից ու ավարտվել նույն տարվա հոկտեմբերին։ Ծրագրի իրականացման արդյունքում Ախպրաձորում արտաքին լուսավորության ցանց է կառուցվել 1000 մետր երկարությամբ՝ ԼԵԴ համակարգով աշխատող 33 լուսատուների տեղադրմամբ։ Ծրագրի իրականացման շնորհիվ Ախպրաձորը լուսավորվել է ամբողջությամբ՝ լրացնելով վերջին տարիներին կառուցված արտաքին լուսավորության ցանցի կիսատ մնացած հատվածները։
Խոսրով Խլղաթյան