2023 թվականին Ակունքում սուբվենցիոն 2 ծրագիր է իրականացվել
3 րոպեի ընթերցում
![2023 թվականին Ակունքում սուբվենցիոն 2 ծրագիր է իրականացվել](http://armenpress.am/resized/480/storage/images/articles/2024/06/28/9dRPtjY3COqVaMUkTl5ilhBJ58zZV0bkqqqtnHls.webp)
ԳԱՎԱՌ, 28 ՀՈՒՆԻՍԻ, ԱՐՄԵՆՊՐԵՍ։ Գեղարքունիքի մարզի Վարդենիս համայնքի Ակունք գյուղում ՀՀ կառավարության կողմից 2023 թվականին իրականացվող սուբվենցիոն ծրագրերի շրջանակներում Ասֆալտապատվել է 13-րդ փողոցը, գերեզմանոց և Պանթեոն տանող ճանապարհները, կառուցվել է ոռոգման ջրատար ցանց։
Սուբվենցիոն 2 ծրագրերի իրականացման նպատակով ծախսվել է 290 միլիոն 100 հազար դրամ, որից 166 միլիոն 650 հազար դրամը ՀՀ կառավարության, 123 միլիոն 450 հազար դրամը Վարդենիսի համայնքապետարանի մասնաբաժինն է։
Ակունքի 13-րդ փողոցի ասֆալտապատման, գերեզմանոց ու պանթեոն տանող ճանապարհի գաբիոնապատման ու ցանկապատման ծրագրի պայմանագրային արժեքը կազմում է 182,1 միլիոն դրամ, որի 50 տոկոսը հատկացրել է ՀՀ կառավարությունը, 50 տոկոսը՝ Վարդենիսի համայնքապետարանը։
Ծրագրի իրականացման արդյունքում ասֆալտապատվել է 13-րդ փողոցի երթևեկելի մասը՝ 1121 գծամետր երկարությամբ եւ շուրջ 7000 քառակուսի մետր մակերեսով, կառուցվել են մայթեր և ջրահեռացման առուներ 500 մետր երկարությամբ, գերեզմանոց եւ Պանթեոն տանող ճանապարհների պատնեշներ՝ 270 մետր երկարությամբ, գծանշվել և կահավորվել են ճանապարհները։
Շինարարական աշխատանքները մեկնարկել են 2023 թվականի սեպտեմբերի սկզբներից և ավարտվել նույն տարվա դեկտեմբերի կեսերին։ Պատնեշի եւ ցանկապատի կառուցումներն իրականացվել են՝ գերեզմանոց եւ պանթեոն տանող ճանապարհների հաճախակի քարաթափումները կանխելու նպատակով։
Ակունքի ոռոգման ջրատար ցանցի կառուցման պայմանագրային արժեքը կազմում է 108 միլիոն դրամ, որի 70 տոկոսը հատկացրել է ՀՀ կառավարությունը, 30 տոկոսը՝ Վարդենիսի համայնքապետարանը։
Ծրագրի իրականացման արդյունքում կառուցվել է 1,5 կիլոմետր երկարության ոռոգման ցանց Ակունքի երկու թաղամասերում և բնակավայրից դուրս գտնվող հատվածներում, երկաթբետոնյա կիսախողովակներով՝ տնամերձերում ու սեփականաշնորհված վարելահողերում, շուրջ 1000 հեկտարի վրա, ոռոգման ջրի մատակարարումը ժամանակին ու անկորուստ ապահովելու նպատակով։ Շինարարական աշխատանքները մեկնարկել են 2023 թվականի հոկտեմբերից և ավարտվել նույն տարվա վերջին։
Ծրագրի շահառու են հանդիսանում Ակունք գյուղի բոլոր տնտեսությունները։