388.16
Հայաստանում առաջին անգամ հանդիսավոր կերպով նշվեց Կանադայի օրը
4 րոպեի ընթերցում
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ։ Երևանում հունիսի 27-ին ՀՀ-ում Կանադայի նորաբաց դեսպանության կողմից առաջին անգամ կազմակերպվել և անցկացվել է Կանադայի 157-րդ տարեդարձին նվիրված հանդիսավոր արարողություն:
«Արմենպրես»-ի հաղորդմամբ՝ տոնակատարության մասնակիցների թվում էին ՀՀ-ում Կանադայի արտակարգ և լիազոր դեսպան Էնդրյու Թըրները, ՀՀ արտաքին գործերի նախարարի տեղակալ Պարույր Հովհաննիսյանը, ՀՀ-ում հավատարմագրված օտարերկրյա մի շարք դեսպաններ, ՀՀ կառավարության և Ազգային ժողովի պատգամավորներ, այլ հյուրեր:
Հանդիսավոր արարողության մեկնարկին բացման խոսքով հանդես եկավ Հայաստանում Կանադայի դեսպանն, ով ներկաներին ողջույնեց հայերենով՝ նշելով, որ հայոց լեզուն սովորում է դեսպան նշանակվելու առաջին օրից:
«Հարգելի հյուրեր, այսօր պատմական օր է՝ մեր դեսպանատան բացումից ի վեր առաջին անգամ նշվում է Կանադայի օրը: Սկսած հոկտեմբերից, երբ բացվել է դեսպանատունը, Կանադայի և Հայաստանի միջև հարաբերություններն ավելի են ամրապնդվել»,-իր խոսքում նշեց Հայաստանում Կանադայի դեսպանը՝ հավելելով, որ երկրի արտաքին գործերի նախարար Մելանի Ժոլիի՝ 2023 թվականի հոկտեմբերին կատարած այցին հաջորդել են խորհրդականների և տարբեր այլ պաշտոնյաների այցելությունները Հայաստան:
Դեսպանը ներկաներին հաղորդեց, որ Կանադայի կանանց, խաղաղության և անվտանգության դեսպանի այցը Հայաստան ընդգծել է համընդհանուր արժեքները, որոնք կիսում են երկու երկրները:
Էնդրյու Թըրները նաև տեղեկացրեց, որ մի քանի ամսվա ընթացքում այցելել է Հայաստանի տարբեր վայրեր և հանդիպել բազմաթիվ հայերի, այդ թվում՝ կանադահայերի, իսկ երկրի գեղեցկությունը, հյուրընկալությունն ու ջերմությունն անհավանական են եղել:
«Ամենակարևորը, դեսպանությունը ցույց է տալիս Կանադայի նվիրվածությունն՝ աջակցելու Հայաստանի ինքնիշխանությանը և տարածքային ամբողջականությանը: Այն ցույց է տալիս նաև աջակցությունն Ադրբեջանի հետ խաղաղության գործընթացին և Հայաստանի ժողովրդավարական բարեփոխումներին»,-ընդգծեց դեսպան Թըրները՝ հստակեցնելով, որ այդ աջակցությունն իրականացվում է դիվանագիտության, հումանիտար աջակցության միջոցով, ՀՀ ազգային ժողովին և քաղաքացիական հասարակությանն աջակցելով, և իհարկե, նրանով, որ Կանադան միացել է Հայաստանում Եվրոպական միության դիտորդական առաքելությանը՝ լինելով ԵՄ անդամ չհանդիսացող երկիր:
Ելույթի ավարտին դեսպանը շնորհակալություն հայտնեց բոլոր ներկաներին հանդիսավոր արարողությանը մասնակցելու և Կանադայի օրը նշելու համար:
Արտաքին գործերի նախարարի տեղակալ Պարույր Հովհաննիսյանը ՀՀ կառավարության անունից ազգային տոնի կապակցությամբ ողջունեց և շնորհավորեց ներկաներին:
«Հայաստանի և Կանադայի միջև դիվանագիտական հարաբերությունների հաստատումից ի վեր երկու երկրներին հաջողվել է երկկողմ օրակարգի, արդյունավետ համագործակցության և գործընկերության ամուր հիմքեր կառուցել, որոնք հիմնված են բարեկամության, փոխադարձ հարգանքի և համընդհանուր արժեքների վրա»,-նշեց փոխնախարարն՝ ընդգծելով, որ Հայաստանն ու Կանադան պահպանում են բարձր մակարդակի քաղաքական երկխոսություն, որում մեծ ներդրում ունի նաև Հայաստանում Կանադայի նորաբաց դեսպանությունը:
Պարույր Հովհաննիսյանն իր խոսքում նաև ընդգծեց, որ Երևանը գնահատում է Կանադայի սկզբունքային դիրքորոշումն՝ աջակցելու Հայաստանի ինքնիշխանությանը, տարածքային ամբողջականությանը և ժողովրդավարության զարգացմանը: Նա նաև շնորհակալություն հայտնեց Կանադային Հայաստանում ԵՄ դիտորդական առաքելության գործունեության շրջանակներում ունեցած շարունակական աջակցության համար:
«Մենք խորապես գնահատում ենք Կանադայի հումանիտար աջակցությունը Լեռնային Ղարաբաղից բռնի տեղահանված հայերին»,-ասաց ԱԳ փոխնախարարը՝ շեշտելով, որ Հայաստանը շահագրգռված է Կանադայի հետ զարգացնել նաև տնտեսական կապերը:
