2 րոպեի ընթերցում
ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Զբոսաշրջային ուղղությունների գրավչությունը պայմանավորված է նաև ավիաչվերթների քանակով:
«Արմենպրես»-ի հաղորդմամբ՝ հայ-վրացական զբոսաշրջային գործարար համաժողովի ավարտին լրագրողների հետ զրույցում նման տեսակետ հայտնեց Տուրիզմի հայկական ֆեդերացիայի նախագահ Մեխակ Ապրեսյանը:
«Իրականում այդ երկու գործոնները փոխկապակցված են: Ավիաչվերթները հեշտացնում են զբոսաշրջիկների այցելություններն ընտրած երկիր կամ վայր: Մյուս կողմից՝ օդային ուղևորությունների կազմակերպիչները չվերթներ սահմանելիս նկատի են ունենում, թե որքանով է պահանջված տվյալ ուղղությունը:
Մեծ գրավչության դեպքում շատանում են այդ ուղղությունը սպասարկող ավիաընկերությունները, ինչը հանգեցնում է մրցակցության աճի և, բնականաբար, անդրադառնում է գնային քաղաքականությանը: Բայց դա տվյալ երկրում տուրիզմը զարգացնելու միջոցներից մեկն է:
Ամեն դեպքում՝ շատ կարևոր է զբոսաշրջային կազմակերպությունների անմիջական շփումն ու երկխոսությունը ավիաընկերությունների հետ: Տուրիզմի հայկական ֆեդերացիան ունի նման փորձ, որը միանգամայն արդյունավետ է: Եթե ավիաընկերությունները չվերթներ կազմակերպեն համապատասխան ուղղություններով, ապա մենք կաջակցենք այդ չվերթների նկատմամբ պահանջարկի աճին: Արդեն իսկ նման համագործակցության դրական փորձ ունենք Լատվիայի և Ռուսաստանի տարածաշրջանների հետ: Պատրաստ ենք համագործակցել մեր ավիաընկերությունների հետ, քանի որ մրցունակ չվերթները շատ կարևոր են մեզ համար: Որպես կանոն, դա նպաստում է զբոսաշրջության զարգացմանը: Ավիաընկերությունները կարող են համոզված լինել դրանում, ինչպես նաև մեր աջակցությանը»,- նշեց Մեխակ Ապրեսյանը: