Նոր հնարավորություններ՝ Հայաստանի բուհերի համար. անցկացվեց «Էրազմուս+ նախագծերի մեկնարկային օր 2024» միջոցառումը
5 րոպեի ընթերցում
![«Էրազմուս+ նախագծերի մեկնարկային օր 2024» միջոցառում](http://armenpress.am/resized/480/storage/images/articles/2024/06/20/LWjYPKV3LLGBcVoWBuyQkDJE8aaWdf1ksGPnNPvD.webp)
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: «Էրազմուս+ նախագծերի մեկնարկային օր 2024» միջոցառմամբ հունիսի 20-ին ՀՀ ԿԳՄՍ նախարարությունը և էրազմուս+ ազգային գրասենյակը ներկայացրին Էրազմուս+ ծրագրի կողմից 2023-ի դրամաշնորհ ստացած բուհերի և ՄԿՈւ հաստատությունների կողմից իրականացվող նախագծերի հիմնական նպատակները, ակնկալվող արդյունքները:
«Արմենպրես»-ի հաղորդմամբ՝ միջոցառմանը ծավալվեցին քննարկումներ՝ ուղղված ոլորտի մարտահրավերներին ու դրանց լուծման ուղիների բացահայտմանը։
Հայաստանում Էրազմուս+ ազգային գրասենյակի համակարգող Լանա Կառլովան ասաց, որ ակադեմիական հանրությունը կծանոթանա 12 ծրագրի: «Ութ ծրագիր ընթանում է բարձրագույն կրթության ոլորտում, չորսը՝ միջին մասնագիտական: Եվրոպական հանձնաժողովի առաջնահերթություններն են կանաչ կրթությունը, թվայնացման տեխնոլոգիաները, ներառական ռազմավարությունը և այլն: Մենք ունենք մի քանի ծրագիր, որ անդրադառնում է կանաչ կրթությանը. ուսումնական ծրագրերը բակալավրում և մագիստրատուրայում վերանայվում են ու դառնում ավելի մատչելի: Մենք ունենք ծրագիր, որ անդրադառնում է գլխավոր կատարման ցուցիչներին, որոնք վերաբերում են համալսարանի մենեջմենթին, դասախոսությանը: Ցուցիչների առկայության պարագայում գնահատման մեխանիզմներն ավելի տեսանելի են դառնում»,-նշեց նա:
Հայաստանում ԵՄ պատվիրակության ղեկավար, դեսպան Վասիլիս Մարագոսն Էրազմուս+-ը կարևոր ծրագիր է համարում Եվրամիության և Հայաստանի համար, և նշում՝ այն լայն հնարավորություններ է բացում դասախոսների և ուսանողների առաջ:
«Այժմ աշխատում ենք ԵՄ-Հայաստան հարաբերությունների ամրապնդման շուրջ, և այս ծրագիրը դառնում է էլ ավելի ռազմավարական ու կարևոր: Մինչ օրս ավելի քան 5000 անձ է օգտվել այս ծրագրից, և սա հսկայական կապիտալ է, որ համատեղ ջանքերով ներդրեցինք, որ Հայաստանը դառնա ավելի լավ վայր, ամրապնդի հարաբերությունները ԵՄ-ի ու իր գործընկերների նաև այլ անդամ երկրների հետ: Մենք արժևորում ենք ընդհանուր արժեքները, գիտելիքի փոխանակումը: Իրականում ուզում ենք՝ Հայաստանը դառնա ավելի դիմակայուն երկիր և ունենա գիտալիքահեն հասարակություն»,-շեշտեց նա:
Դեսպանը կարևորում է քաղաքացիների ակտիվությունը և՛ ԵՄ-ում, և՛ Հայաստանում: «Մենք բախվում ենք նույն մարտահրավերներին, մեզ պետք է մարդկային կապիտալ, ինչը ձևավորում ենք ոչ միայն փոխանակման ծրագրերի միջոցով, այլև բարձրագույն կրթության, միջնակարգ կրթության միջոցով, ուստի ԵՄ-ն շատ ներդրումներ է անում կրթության ոլորտում: Մենք ներդրումներ ենք անում նաև ոչ պաշտոնական կրթության ոլորտում, մի շարք ծրագրեր կան ԹՈՒՄՈ-ի հետ, աշխատում ենք Հայաստանի երեխաներ հիմնադրամի համար Լոռու մարզում, հիմա երկու նոր կենտրոն ենք պատրաստում Սյունիքում»,-ասաց Մարագոսը:
Նա կարևորեց կարողությունների ստեղծումը՝ նշելով, որ պետք է ամրապնդել պետության կարողությունը: Ըստ դեսպանի՝ քաղաքացիական հասարակությունը կարող է լուրջ դերակատարում ունենալ այդ հարցում, ինչին իրենք աջակցում են:
ՀՀ ԿԳՄՍ նախարարի տեղակալ Արթուր Մարտիրոսյանն էլ նշեց՝ կրթության՝ մինչև 2030 թվականի զարգացման պետական ծրագրում կան հավակնոտ նախաձեռնություններ՝ կրթական ենթակառուցվածքների բարելավումը, կրթական ծրագրերի բարեփոխումը, միկրոորակավորումների ներդրումը և այլն:
«Այդ առումով Էրազմուս+ ծրագիրը հետաքրքիր գործիք է, որ հայկական բուհերին հնարավորություն է տալիս Արևելյան գործընկերության այլ երկրների բուհերի և ԵՄ բուհերի հետ համատեղ ծրագրեր իրականացնել: Մենք ունենք ութ ծրագիր, որոնցից չորը ինստիտուցիոնալ են, չորսը՝ ազգային: Ազգային նշանակում է, որ նրանք այնպիսի ինստիտուցիոնալ կարողություն են ստեղծելու, որ մյուս բուհերն էլ կարող են օգտվել: Բուհերի թվայնացումը, կանաչ կրթությունը կամ նման այլ բաներ, իսկ մյուս ծրագրերը տվյալ բուհում կոնկրետ կարողության ձևավորմանն են նպաստում կամ որևէ կոնկրետ մասնագիտության կամ խմբի արդիականացմանն են միտված»,-շեշտեց նա և հավելեց Էրազմուս+-ը ԵՄ ֆինանսավորմամբ իրականացվող ծրագիր է:
Փոխնախարարը կարծում է, որ նախարարությունը մեկ հարկի տակ է հավաքում ծրագրերը և հնարավորություն է տալիս բուհերի միջև երկխոսություն ստեղծել: «Մենք խրախուսում ենք, որ բուհերը, վայելելով իրենց ակադեմիական ազատությունը, ինքնավարությունը, օգտվեն խրախուսական գործիքակազմից: Բուհերը մեր երկրի հանրային կյանքում կարևորագույն հարթակներ են, եթե այդ կառույցները զարգանան, ոչ միայն կնպաստեն կրթության զարգացմանը, այլև հանրային կյանքի տարբեր ոլորտներում բարեփոխումներին»,-եզրափակեց Արթուր Մարտիրոսյանը: