Ռուսաստանը և Հյուսիսային Կորեան պարտավորվել են օգնել միմյանց երկրներից մեկի դեմ ագրեսիայի դեպքում. Լավրով
2 րոպեի ընթերցում
ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Ռուսաստանը և ԿԺԴՀ-ն համաձայնություն են ձեռք բերել օգնություն ցույց տալ միմյանց երկրներից մեկի դեմ ագրեսիայի դեպքում: «Արմենպրես»-ի փոխանցմամբ՝ այս մասին հայտնել է ՌԴ արտգործնախարար Սերգեյ Լավրովը «ՌԵՆ ՏՎ» հեռուստաալիքին տված մեկնաբանությունում։
«Պայմանագրի չորրորդ հոդվածին համապատասխան կա համաձայնություն՝ միմյանց օգնություն ցույց տալու ցանկացած պայմանավորվող երկրի դեմ ագրեսիայի դեպքում», - ասել է Լավրովը՝ մեկնաբանելով Ռուսաստանի և ԿԺԴՀ-ի միջև Համապարփակ ռազմավարական գործընկերության պայմանագրի ստորագրումը։
«(Խմբ․՝ Ռուսաստանի նախագահ Վլադիմիր Պուտինը) նաև հիշատակել է, որ մենք ուշադրություն ենք դարձնում, թե ինչպես է Արևմուտքն Ուկրաինային առատորեն մատակարարում հեռահար, ժամանակակից զենքեր, ներառյալ միջուկային զենք կրելու ունակ ինքնաթիռներ, որպեսզի (խմբ․՝ Ուկրաինան) կարողանա խոցել ցանկացած թիրախ Ռուսաստանի Դաշնության տարածքում: Այդ առնչությամբ նա չի բացառել ռազմատեխնիկական համագործակցության զարգացումը», - հավելել է նախարարը։
Ռուսաստանը և ԿԺԴՀ-ն երկու երկրների ղեկավարների մասնակցությամբ ռուս-կորեական բանակցությունների արդյունքներով ստորագրել են Համապարփակ ռազմավարական գործընկերության համաձայնագիր։ Փաստաթղթի տակ իրենց ստորագրություններն են դրել Ռուսաստանի նախագահը և ԿԺԴՀ պետական գործերի նախագահ Կիմ Չեն Ընը։
Ինչպես նշել է ՌԴ նախագահի օգնական Յուրի Ուշակովը, նոր փաստաթուղթը կկատարի միջազգային իրավունքի բոլոր հիմնարար սկզբունքները, չի կրի առճակատման բնույթ և ուղղված չի լինի որևէ երկրի դեմ, այլ նպատակաուղղված կլինի Հյուսիսարևելյան Ասիայի տարածաշրջանում ավելի մեծ կայունության ապահովմանը: