Օրբանը հայտարարել է ՆԱՏՕ-ի երաշխիքների մասին՝ Հունգարիայի կողմից Ուկրաինային չաջակցելու հնարավորության առթիվ

ԵՐԵՎԱՆ, 18 ՀՈՒՆԻՍԻ, ԱՐՄԵՆՊՐԵՍ։ Հունգարիան պայմանավորվել է ՆԱՏՕ-ի հետ, որ չի ուղարկի իր ուժերը՝ մասնակցելու դաշինքի գործողություններին՝ Ուկրաինային զորակցելու համար, և չի աջակցի նաև ֆինանսապես, եթե Նիդեռլանդների ներկայիս վարչապետ Մարկ Ռյուտեն դառնա դաշինքի հաջորդ քարտուղարը։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին  հայտնել է Հունգարիայի վարչապետ Վիկտոր Օրբանը։ 

«Մենք կարևոր պայմանավորվածություն ենք ձեռք բերել ՆԱՏՕ-ի գլխավոր քարտուղար Յենս Ստոլտենբերգի հետ: Պայմանավորվել ենք, որ ոչ մի հունգար զինվորական չի մասնակցի ՆԱՏՕ-ի գործողություններին Ուկրաինայում և հունգարական ֆինանսական միջոցները չեն օգտագործվի նրանց աջակցելու համար»,- ասել է Օրբանը։

Հունգարիայի վարչապետը հավելել է, որ հանդիպումից հետո Մարկ Ռյուտեն հաստատել է իր աջակցությունն այդ համաձայնագրին և հավատարիմ կմնա դրան, եթե ստանձնի ՆԱՏՕ-ի գլխավոր քարտուղարի պաշտոնը։ Օրբանը համապատասխան հայտարարությամբ նամակ է հղել Ռյուտեին։

Ավելի վաղ Նիդեռլանդների վարչապետը հունգարացի գործընկերոջը՝ Վիկտոր Օրբանին խոստացել էր, որ եթե ինքը դառնա ՆԱՏՕ-ի գլխավոր քարտուղար, Հունգարիան իրավունք կունենա հրաժարվել իր տարածքից դուրս դաշինքի գործողություններին մասնակցելուց՝ ի աջակցություն Ուկրաինայի։