Եվրո-2024. Իսպանիան խոշոր հաշվով հաղթեց Խորվաթիային

ԵՐԵՎԱՆ, 15 ՀՈՒՆԻՍԻ, ԱՐՄԵՆՊՐԵՍ: Ֆուտբոլի Եվրոպայի առաջնության խմբային փուլի (B խումբ) առաջին խաղում Իսպանիան ուժերը չափեց Խորվաթիայի հետ:

«Արմենպրես»-ի հաղորդմամբ`  Բեռլինի Օլիմպիական մարզադաշտում կայացած խաղի մեկնարկում Իսպանիան տիրել էր գնդակին և խորվաթները հիմնականում պաշտպանվում էին: «Կարմիր Ֆուրիա»-ն կարողացավ իրացնել իր պահը` արագ հակագրոհներից մեկի ժամանակ բացելով հաշիվը: Դիպուկությամբ աչքի ընկավ Ալվարո Մորատան: Րոպեներ անց Իսպանիան երկրորդ գնդակն էլ խփեց: Գոլի հեղինակ դարձավ Ֆաբիան Ռուիզը: Խաղակեսի վերջակետը դրվեց ավելացված ժամանակի երկրորդ րոպեին, երբ Իսպանիայի երրորդ գնդակը խփեց Կարվախալը: 

Երկրորդ կեսում Խորվաթիան ամեն գնով փորձում էր բեկել հանդիպման ընթացքը, սակայն նրանք չիրացրեցին անգամ նշանակված 11 մետրանոց հարվածը: Իսկ Իսպանիան հստակ էր գործում պաշտպանությունում: 

Իսպանիա-Խորվաթիա`3:0:

B խմբում Երևանի ժամանակով 23:00-ին Իտալիան կմրցի Ալբանիայի հետ: 

Երկրորդ տուրում Իսպանիան հունիսի 20-ին կխաղա Իտալիայի հետ, իսկ Խորվաթիան հունիսի 19-ին կմրցի Ալբանիայի դեմ: