ԵԹԿՊ-ի ուսանող Վրեժ Սարգսյանի «Աշխարհից այն կողմ» պիեսը լավագույնն է ճանաչվել միջազգային փառատոնում
1 րոպեի ընթերցում
ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Երևանի թատրոնի և կինոյի պետական ինստիտուտի ռեժիսուրա մասնագիտության 2-րդ կուրսի ուսանող Վրեժ Սարգսյանի «Աշխարհից այն կողմ» պիեսը հաղթող է ճանաչվել Վրաստանում կայացած «Իվերիա» միջազգային գրական փառատոնի «Տարվա լավագույն պիես» անվանակարգում:
«Արմենպրես»-ի հաղորդմամբ՝ այս մասին հայտնում է բուհը:
«Պիեսներ գրելու ցանկություն միշտ եմ ունեցել, բայց միշտ կաշկանդվում էի որևէ բան գրել: Հեռուստատեսությամբ տեղեկացա, որ մեր երկրում նույնպես մեծացել է հղիության արհեստական ընդհատումների թիվը։ Այդ նույն շրջանում ընթերցում էի Վիլյամ Սարոյանի «Տարեկանի արտում» պիեսը, որը չծնված մարդկանց մասին է, ովքեր նախքան ծնվելը գիտեին՝ ինչ է լինելու իրենց հետ, իսկ ծնվելուց մոռանում էին ամեն բան։ Այս ամենն ինձ ստիպեց մտածել շատ հարցերի շուրջ»,-ասում է Վրեժը՝ հավելելով, որ երկար է աշխատել լավ արդյունք ստանալու համար:
Բուհի ռեկտոր Սառա Նալբանդյանը շնորհավորել է ուսանողին՝ մաղթելով ստեղծագործական նորանոր ձեռքբերումներ: