2 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ։ Հայաստանի Հանրապետության մարդու իրավունքների պաշտպան Անահիտ Մանասյանը Հաթերքի գյուղապետի ձերբակալման, նրա մանկահասակ երեխաներին մեքենայում միայնակ թողնելու հետ կապված պարզաբանում կպահանջի ՀՀ ազգային անվտանգության ծառայությունից:
«Արմենպրես»-ի փոխանցմամբ՝ այս մասին հաղորդագրություն է տարածել ՄԻՊ-ը՝ հաշվի առնելով հանրային լայն արձագանքը, նաև ՄԻՊ աշխատակազմում ստացվող հարցումները:
«Մարդու իրավունքների պաշտպանի աշխատակազմում ահազանգ է ստացվել առ այն, որ ձերբակալել են Հաթերքի գյուղապետ Վարդան Գրիգորյանին՝ մեքենայում միայնակ թողնելով վերջինիս մանկահասակ երեխաներին։ Պաշտպան Անահիտ Մանասյանի հանձնարարությամբ՝ դեպքի մանրամասները հրատապության կարգով բանավոր ընթացակարգով ճշտվել են պետական իրավասու մարմինների հետ:
Արդյունքում, պարզվել է, որ Վարդան Գրիգորյանն ազատ է արձակվել: Դեպքի հանգամանքների մանրամասները պարզելու նպատակով գրավոր պարզաբանում կպահանջվի նաև ՀՀ ազգային անվտանգության ծառայությունից»,- նշված է հաղորդագրության մեջ:
Ավելի վաղ իրավապաշտպան Ռուբեն Մելիքյանը «Ֆեյսբուք»-ի իր էջում գրել էր, որ Բյուրականի մոտակայքում սեփական մեքենայից ձերբակալել են Հաթերքի գյուղապետ Վարդան Գրիգորյանին։
Իրավապաշտպանի գրառման մեջ նշվում էր՝ փորձում են ճշտել տեղեկությունը, որ ձերբակալողները մեքենայում մենակ են թողել Վարդան Գրիգորյանի մանկահասակ երեխաներին։