Զինծառայողների ապահովագրության ազգային հիմնադրամի շահառուների հատուցման գումարն աճել է 26 տոկոսով
1 րոպեի ընթերցում
![Զինծառայողների ապահովագրության ազգային հիմնադրամի շահառուների հատուցման գումարն աճել է 26 տոկոսով](http://armenpress.am/resized/480/storage/images/articles/2024/06/12/2q9rYuPxJfG2rdV8uMBc4VtEIeRgDlwJcSK0oQnc.webp)
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ։ Զինծառայողների ապահովագրության ազգային հիմնադրամի շահառուների հատուցման գումարը 2024 թվականի հունվարի 1-ից բարձրացել է 26 տոկոսով։
«Արմենպրես»-ի հաղորդմամբ՝ այս մասին հունիսի 12-ին կայացած մամուլի ասուլիսին հայտնեց Զինծառայողների ապահովագրության ազգային հիմնադրամի հոգաբարձուների խորհրդի նախագահ Իրինա Սեյլանյանն՝ անդրադառնալով օրենսդրական փոփոխություններին, որոնց արդյունքում հիմնադրամը հնարավորություն է ստացել ֆինանսական հատուցումներից զատ իրականացնել նաև սոցիալական ծրագրեր։
«Հատկապես, ցանկանում եմ նշել, որ այս տարվա սկզբի հոգաբարձուների խորհրդի որոշմամբ, համագործակցելով կառավարության մեր գործընկերների հետ, մենք վերանայել և ինդեքսավորել ենք շահառուների հատուցման գումարը՝ բարձրացնելով այն 26 տոկոսով 2024թ․ հունվարի 1-ից։ Այս նախաձեռնության արդյունքում հիմնադրամի տարեկան պարտավորությունները կաճեն մոտ 4 միլիարդ ՀՀ դրամով»,- նշեց Սեյլանյանը։
Նրա խոսքով՝ անցյալ շաբաթ հոգաբարձուների խորհուրդը մեկ այլ որոշում է կայացրել, որը կբարելավի հիմնադրամի շահառուների՝ մանկուց հաշմանդամ ճանաչված երեխաների սոցիալական վիճակը: